Şeyxülislam Gürcüstan prezidenti ilə görüşüb

“Azərbaycan tolerant ölkədir və qonşu dövlətlərlə əlaqələrin hərtərəfli inkişafında maraqlıdır”.

Gürcüstana səfərdə olan Qafqaz Müsəlmanları İdarəsinin (QMİ) sədri Allahşükür Paşazadə bu ölkənin prezidenti Giorgi Marqvelaşvili ilə görüşündə belə deyib.

O, hər iki ölkənin dini liderləri arasındakı dostluq və qardaşlıq münasibətlərinin olduğunu, bunun radikalizmə, terrorizmə, din adından istifadə edənlərə qarşı birgə mübarizəyə geniş imkanlar yaratdığını bildirib.

Allahşükür Paşazadə dinlərarası dialoqun inkişafı ilə bağlı Azərbaycanda həyata keçirilən islahatlar, təşkil olunan beynəlxalq forumlar və konfranslar barədə geniş məlumat verib.

Gürcüstana prezidenti isə Azərbaycanın ölkəsinin yaxın dostu və strateji tərəfdaşı olduğunu vurğulayıb.

“Biz regionda sülhün və əmin-amanlığın möhkəmlənməsində dini liderlərin rolunu yüksək qiymətləndiririk. Gürcüstan tolerant ölkədir və dini radikalizmə, din adından istifadə edərək sabitliyin pozulmasına qarşıdır. Biz bu sahədə də birgə mübarizə aparmalıyıq”, prezident deyib.

O, Gürcüstanda yaşayan azərbaycanlıların bu ölkənin siyasi, iqtisadi və mədəni həyatındakı rolunu yüksək qiymətləndirib.

Görüşdə regionda mövcud olan münaqişələr də diqqət mərkəzində olub və bu münaqişələrin həllində dini liderlərin rolunun artırılmasının vacibliyi qeyd olunub.