Siyasətin paradoksları: təhqirlərin sayəsində Məhəmməd Əmin Rəsulzadənin abidəsi bərpa edildi

İlk müstəqil Azərbaycan Respublikasının banisi Məhəmməd Əmin Rəsulzadəyə çoxillik etinasızlıq, hətta  təhqirlər Gəncədə onun büstünün bərpası ilə nəticələnib.

Şəhər meri Elmar Vəliyevin məsuliyyətsiz və nəzakətsiz davranışları sayəsində Rəsulzadənin büstündə  başına qara torba keçirilmişdi. Çoxsaylı müraciətlərə, tarixi şəxsiyyətlərə qarşı bu cür hörmətsizliyə son qoyulmasına yönələn çağırışlara baxmayaraq, bu rüsvayçılıq üç ildir ki, davam edirdi.

Çağırışlara cavab olaraq E.Vəliyev mətbuatı və abidənin normal duruma salınmasını tələb edənləri təhqir edirdi. Lakin E.Vəliyevin hərəkətləri o qədər sirayətedici oldu ki, estafeti onun müavini Naqif Həmzəyev davam etdirdi. O, nəinki Rəsulzadənin başına torpa keçirilməsinə bəraət qazandırdı, hətta onu satqın, xəyanətkar adlandırdı. 

Bu yaxınlarda hakimiyyət tərəfindən parlament kürsüsündə əyləşdirilən bu gəncin fikirləri sosial şəbəkələrdə böyük hiddət, qəzəb doğurdu, ölkə rəhbərliyində buna aydınlıq gətirilməsinə səbəb oldu.

Belə ki, deputatların bir çoxu hakim partiyanın gənc üzvünün mandatının geri alınmasına və onun cəzalandırılmasına çağırıb.

Bu gün səhər məlum olub ki, E.Vəliyev Rəsulzadənin abidəsi önündə ərazinin təmizlənməsi, onun büstünün üzərindən torbanın götürülməsi barədə göstəriş verib.

Lakin baş verənlər təkcə Gəncə rəhbərliyinin özbaşınalığını göstərmir, bu, həm də ölkə hakimiyyətinin Azərbaycan Xalq Cümhuriyyətinin liderlərinə olan münasibətinin göstəricisidir. Prezident Administrasiyası imkan verməsəydi E.Vəliyev və onun əlaltıları özlərini bu cür aparmağa cəsarət etməzdilər.-02В-