Siyasi məhbusun həyat yoldaşı ailəsinin acınacaqlı vəziyyətdə olduğunu bildirir

Aygün Hümbətova - vətəndaşın sağlamlığına xəsarət yetirmə ittihamı ilə həbs edilmiş AXCP üzvü Aqil Hümbətovun həyat yoldaşı Turan Agentliyinə müraciət edərək, ailəsinin acınacaqlı vəziyyətdə olduğunu bildirib.

"Bizim üç övladımız var, biri anadangəlmə autizm xəstəsidir. Evdə rütubət olduğuna görə uşaq revmatizm olub, digər uşağın allergik öskürəyi var. Dərman almağa pulumuz yoxdur, xəstə uşaq yerdə yatmaq məcburiyyətindədir, çünki çarpayı qırılıb və mən onu atmışam, yenisini, hətta qatlanıb-açılan çarpayı belə almağa isə pulum yoxdur. Dövlət ailəmizə sosial müavinət ödəməkdən imtina edib, belə ki, yoldaşımdan qalan moped "nəqliyyat vasitəsi" hesab olunur və buna görə ailə ehtiyacı olanlar kateqoriyasına düşmür", deyə A.Hümbətova bildirib.

Ailə yalnız dövlətin xəstə uşağa baxmaq üçün verdiyi müavinətlə yaşayır.

Aqil Hümbətov həbsindən əvvəl üç xəstə uşaq olan ailəsini dolandırmaq üçün yük yeri olan mopedlə küçələrdən metalı yığıb metal qırıntıları toplama məntəqələrinə təhvil verirdi.

"Azərbaycan prezidentinə müraciət edirəm, həyat yoldaşımın azad edilməsini və bizə sosial müavinət ödənilməsini tələb edirəm", deyə siyasi məhbusun həyat yoldaşı bildirib.

Aqil Hümbətov 11 avqust 2021-ci il tarixində Bakı yaxınlığında yerləşən Zirə qəsəbəsinin sakininə bıçaq xəsarəti yetirməsi ehtimalı ilə əlaqədar saxlanılıb. Vəkili Hümbətovun etiarfı döyüldükdən sonta təzyiq altında imzaladığını iddia edirdi. Sonradan Hümbətov ilk ifadələrindən imtina edib, onların işgəncə altında verildiyini bildirib. 15 noyabr 2021-c il tarixində Bakı məhkəməsi Hümbətovu 10 il həbs cəzasına məhkum edib. Hüquq müdafiəçiləri Hümbətovu siyasi məhbus kimi tanıyıblar.