Siyasi mühacir Tural Sadıqlının qardaşı 2 ay müddətinə həbs olunub

Fevralın 14-də Sabunçu Rayon Məhkəməsinin qərarı ilə siyasi mühacir Tural Sadıqlının qardaşı Elgiz Sadıqlının barəsində 2 ay müddətinə həbs qətimkan tədbiri seçilib.

Gənc CM-in 234.1-ci maddəsi (satış məqsədi olmadan qanunsuz olaraq narkotik vasitələrin şəxsi istehlak miqdarından artıq miqdarda əldə edilməsi və ya saxlanması) ilə ittiham olunur. Bu maddə üç ilədək azadlıqdan məhrumetmə cəzasını nəzərdə tutur.

E.Sadıqlı özünü günahkar saymır. Bunu Turan-a vəkil Yavər Hüseynov bildirib.

Polisin bildirdiyinə görə, E.Sadıqlı saxlanılan zaman onun üzərində 5 qr. marixuana aşkar edilib, daha 1,5 qr. isə avtomobilinin yük yerində olub.

Vəkil ittihamı əsassız hesab edir. Onun sözlərinə görə, məhkəməyə təqdim olunan ilkin sübutlar yalnız polislərin ifadələrinə əsaslanıb.

Müdafiə tərəfi qablaşdırılmış narkotik maddənin üzərində E.Sadıqlının barmaq izlərinin olub-olmamasını müəyyən etmək üçün daktiloskopik ekspertizanın aparılması barəsə vəsatət qaldırmaq niyyətindədir.

E.Sadıqlının atası Əlövsət Sadıqlı cinayət işini uydurma və siyasi motivli hesab edir.

Siyasi mühacirətdə olan T.Sadıqlı əmindir ki, qardaşı onun siyasi fəaliyyəti və yanvarın 21-də prezident İlham Əliyevin Berlin səfəri zamanı etiraz aksiyasında iştirakı ilə əlaqədar təqib olunur.

Xatırladaq ki, E.Sadıqlı fevralın 13-də atası ilə birlikdə saxlanılıb.

Lakin bir sutkadan sonra Ə.Sadıqlını buraxıblar.

E.Sadıqlı siyasi fəaliyyətlə məşğul olmur.

DİN E.Sadıqlının işində siyasi motivlərin olmasını inkar edir.—06B--