SMDTM-nin rəhbəri Anar Məmmədli üç ay müddətinə həbs olunub (YENİLƏNİB-video)

Son məlumata görə, Nəsimi Rayon Məhkəməsi Anar Məmmədlinin barəsində üç ay müddətinə həbs qətimkan tədbiri seçib. A.Məmmədli öz vəkili ilə görüşmək imkanlarından məhrum edilib. Onu dövlət tərəfindən təyin olunmuş vəkil müdafiə edib.

*   *   *

2013 dekabr 16 (bazar ertəsi) 21:11:22

 Seçkilərin Monitorinqi və Demokratiyanın Tədrisi Mərkəzinin (SMDTM) rəhbəri Anar Məmmədli saxlanılıb. Bu gün saat 16:30-da o, SMDTM-nin icraçı direktoru Bəşir Süleymanlı və beynəlxalq volontyorlar əməkdaşlığı  QHT-nin rəhbəri Elnur Məmmədli Baş Prokurorluğun Ağır Cinayətlər üzrə İstintaq İdarəsinə çağırılıblar. Oktyabrın sonlarında bu idarə vergidən yayınma, qanunsuz sahibkarlıq və vəzifə səlahiyyətlərini aşma maddələri üzrə SMDTM-yə qarşı araşdırmaya başlayıb.

  Prokurorluğa çağırıldıqdan iki saat sonra B.Süleymanlı və E.Məmmədov buraxılıb. Bir qədər sonra təyinat üzrə vəkil onlara zəng edərək bildirib ki, A.Məmmədli həbs olunub və barəsində həbs qətimkan tədbirinin seçilməsi üçün onu Nəsimi Rayon Məhkəməsinə aparırlar.

  Qeyd edək ki, SMDTM 9 oktyabr prezident seçkilərinin monitorinqini keçirib və çoxsaylı qanun pozuntusu qeydə alıb.

  Müşahidəçilər təşkilata və onun liderinə qarşı cinayət təqiblərini məhz seçkilərin tənqidi ilə əlaqələndirirlər. –06D--