SOCAR Mübariz Mənsimovun həbsi ilə əlaqəsi olması haqqında iddiaları təkzib edir

Bakı/18.03.20/Turan: Azərbaycan Dövlət Neft Şirkəti SOCAR-ın Palmali nəqliyyat şirkətinin sahibi Mübariz Mənsimovun Türkiyədə həbsi ilə heç bir əlaqəsi yoxdur.

SOCAR-ın bununla bağlı bəyanatında deyilir ki, Mənsimov Türkiyənin hüquq-mühafizə orqanları tərəfindən həbs edilib və bunun SOCAR-ın Mənsimova qarşı London və Dubayda keçiriləcək arbitraj prosesləri ilə heç bir əlaqəsi yoxdur.

SOCAR-ın Palmali-yə qarşı 2018-ci ildə başlamış arbitraj məhkəmələrinin uzanması SOCAR-ın maraqlarına uyğun deyil, belə ki, şirkətin maliyyə balansına mənfi təsir göstərir, deyə bəyanatda qeyd edilir.

SOCAR etiraf edir ki, Palmali ilə aralarında əvvəllər kommersiya münasibətləri mövcud olub, amma Mənsimovun şirkətinin müqavilələr üzrə öhdəliklərini yerinə yetirməməsi SOCAR-ın Palmali-yə qarşı üç məhkəmə iddiasına səbəb olub. Bu dövr ərzində Mənsimovun şirkəti müxtəlif bəhanələrlə bu arbitraj məhkəmələrinin keçirilməsini gecikdirir, deyə SOCAR-ın bəyanatında bildirilir.

* Qeyd edək ki, Mübarizə Mənsimov dəfələrlə SOCAR prezidenti Rövnəq Abdullayevin və onun qohumu Anar Əliyevin ünvanına ittihamlarla çıxış edib. Mənsimovun sözlərinə görə, şirkət rəhbərliyi Türkiyədə hərbi çevriliş cəhdində ittiham olunan FETÖ - Fetullah Gülenin terror təşkilatını dəstəkləyir.

Mənsimov həmçinin iddia edirdi ki, Rövnəq Abdullayev törəmə Heritage General Trading şirkəti vasitəsilə SOCAR-a məxsus dövlət vəsaitlərini mənimsəyir. -02D-