Solovyov Qarabağ münaqişəsinə münasibətini dəyişdirəcək?

Bakı/08.04.17/Turan: Dünən Azərbaycan prezidenti İlham Əliyev Ümumrusiya Dövlət Teleradio Şirkətinin televiziya və radio aparıcısı Vladimir Solovyovu qəbul edib.

Vladimir Solovyov Bakıya ilk dəfə səfər etdiyini bildirərək paytaxtımızda sürətli inkişaf proseslərinin onda böyük təəssürat doğurduğunu və Bakının çox gözəl şəhər olduğunu vurğulayıb, bu barədə prezidentin saytında dərc olunmuş məlumatda deyilir.

Öz növbəsində, Azərbaycan haqqında reallıqların dünya ictimaiyyətinə çatdırılması istiqamətində fəal işlər görüldüyünü qeyd edib. O, Ermənistan-Azərbaycan, Dağlıq Qarabağ münaqişəsi ilə bağlı Azərbaycanın mövqeyini diqqətə çatdırıb. 

Əliyev həmçinin qeyd edib ki, Azərbaycan ilə Rusiya arasında bütün digər sahələrdə olduğu kimi, humanitar əlaqələr, o cümlədən media sahəsində də uğurlu əməkdaşlıq həyata keçirilir.

Solovyov ətraflı və dolğun informasiyaya görə dövlət başçısına minnətdarlığını bildirib, Azərbaycanda gedən proseslərlə yaxından tanış olmağın onun üçün böyük maraq doğurduğunu qeyd edib.

Hazırda Solovyov bir sıra tok-şouların və "Vesti FM" radiosunun aparıcısıdır. Solovyov Qarabağ münaqişəsində erməniyönlü və anti-Azərbaycan mövqe ifadə etməsi ilə məşhurdur. Bu mənada bir müddət əvvəl Vladimir Jirinovskinin Azərbaycana səfəri kimi, Solovyovun Bakı səfəri də gözlənilməz hadisə hesab oluna bilər.  –06D--