Ştaynmayer atəşkəs rejiminin möhkəmləndirilməsi və hərtərəfli nizamlanma barədə

ATƏT-in fəaliyyətdə olan sədri, Almaniyanın XİN rəhbəri Frank-Valter Ştaynmayer  çərşənbə axşamı Dağlıq Qarabağ münaqişəsinin nizamlanmasına dair bəyanat yayıb.

“Təmas xəttində vəziyyət gərgin olaraq qalır. Mən son hadisələr zamanı baş verən insan itkilərinə görə çox təəssüf edirəm və tərəfləri atəşkəs rejiminə əməl etməyə çağırıram. Bu kontekstdə  mayın 16-da Ermənistan və Azərbaycan prezidentləri ilə görüş təşkil edən - ATƏT-in Minsk Qrupunun həmsədr ölkələri - Rusiya Federasiyası, Amerika Birləşmiş Ştatları və Fransadan olan həmkarlarımın təşəbbüsünü alqışlayıram”, - ATƏT-in saytında dərc edilən bəyanatda deyilir.

O, hər iki prezidentin münaqişənin sülh yolu ilə həlli üçün atəşin dayandırılmasına,  eləcə də iyun ayında danışıqların yeni raundunun keçirilməsinə hazır olmasından məmnunluğunu ifadə edib.

Almaniya 2016-cı ildə ATƏT-də sədrliyi dövründə Minsk Qrupu həmsədrlərinin  fəaliyyətini dəstəkləməkdə əzmlidir.

“Biz insidentlərin araşdırılması mexanizminin yaradılmasına dair səyləri fəal dəstəkləyəcəyik. Həmçinin mənim şəxsi nümayəndəm, səfir Anjey Kasprşikin komandasının genişləndirilməsi üzərində işləyəcəyik.   

Apreldə baş vermiş hərbi əməliyyatların eskalasiyası dalandan çıxmaq üçün səylərin artırılmasının vacib olduğunu bir daha xatırlatdı.

Hərtərəfli nizamlanmaya dair danışıqların bərpası məqsədilə əlverişli şəraitin yaradılması üçün atəşkəs rejiminin möhkəmləndirilməsi əsas məsələdir", -   Frank-Valter Ştaynmayer vurğulayıb.—06D--