Sülh çağırılışları Qarabağ problemini həll etmir – Çavuşoğlu

Bakı/06.10.20/Turan: Türkiyə Ermənistan tərəfindən işğal edilmiş ərazilərinin azad edilməsi uğrunda mübarizə aparan qardaş Azərbaycanla həmrəydir. Bu barədə Türkiyə XİN başçısı Mevlut Çavuşoğlu çərşənbə axşamı Bakıda Azərbaycanlı həmkarı Ceyhun Bayramovla birgə mətbuat konfransında bildirib.

Çavuşoğlunun sözlərinə görə, cəbhədə məğlubiyyətə uğrayan Ermənistan SQ Azərbaycanın yaşayış məntəqələrinə atəş açır, bununla da hərbi cinayət törədir. XİN başçısı Ermənistan SQ-nin əməllərini “Yerevanın zəifliyinin göstəricisi” adlandırıb.

“Sülh çağırışları Cənubi Qafqazda problemləri həll etmir, problemlərin mənbəyini aradan qaldırmır. Dünya ictimaiyyəti Ermənistanı işğal edilmiş Azərbaycan ərazilərindən qoşunlarını çıxarmağa çağırmalıdır”, deyə Türkiyə naziri bildirib.

O, həmçinin vasitəçi ölkələrin mövqeyini tənqid edib.

“ATƏT-in Misnk Qrupunun həmsədrləri işğalçını - Ermənistanı ərazilərinin 20%-i işğal altında olan Azərbaycanla tərəzinin eyni gözünə qoyur. Dünya ictimaiyyəti başa düşməlidir ki, bu vəziyyət davam edə bilməz”, deyə nazir qeyd edib. -02D-