Rəsmi Tehran Ermənistan qüvvələrini işğal edilmiş ərazilərdən çıxarmağa çağırıb

Bakı/06.10.20/Turan: Ermənistan Azərbaycanın işğal edilmiş torpaqlarını dərhal tərk etməlidir. Bu barədə YJC agentliyinə müsahibəsində İran Dini liderinin beynəlxalq məsələlər üzrə müşaviri və ölkənin keçmiş xarici işlər naziri Əli Əkbər Velayəti bildirib.

“Biz dövlətlərin ərazi bütövlüyü prinsipinə hörmət edirik. BMT üzvü olaraq İran bu məsələdə prinsipial mövqe tutur. Xüsusən, münaqişə tərəfləri bizim şimal qonşularımızdırsa”, deyə o bildirib.

Əli Xameneyinin müşaviri bir ölkənin ərazilərinin başqa ölkə tərəfindən işğalının yolverilməz olduğunu qeyd edib. “Dağlıq Qarabağ və Azərbaycan Respublikasının ona bitişik yeddi rayonu işğal edilib. BMT bu məsələ ilə bağlı dörd qətnamə qəbul edib. Onlar hamısı Ermənistandan işğal edilmiş əraziləri tərk etməyi, beynəlxalq sərhədlərinə qayıtmağı tələb edir”, deyə o bildirib.

Velayəti qeyd edib ki, BMT üzü olan bütün dövlətlər beynəlxalq hüquq normalarına və BMT TŞ-nin qətnamələrinin tələblərinə tabe olmalıdır.

“Tehran Ermənistanın işğal edilmiş əraziləri Azərbaycan Respublikasına qaytarmasının tərəfdarıdır. Milyondan çox azərbaycanlı öz torpaqlarını tərk etmək məcburiyyətində qalıb. Bu insanlar öz evlərinə qayıtmalıdırlar”, deyə o qeyd edib.

“Problemlər hərbi yolla həll edilməməlidir. Siyasi vasitələr vacibdir. İran hərbi təşəbbüslərin əleyhinədir. Bu müharibədə uduzan dinc sakinlərdir. Son günlər dinc kəndlər və şəhərlər bombardmana məruz qalır. Müharibə hər iki xalqın maraqlarına ziddir və regionun təhlükəsizliyini təhdid altına qoyur”, deyə Velayəti bildirib. -02D-