Lourens Broers: Atəşkəs rejiminin bərpası ilə kifayətlənmək olmaz

Bakı/06.10.20/Turan: Tərəflərin yalnız hərbi obyektlərə atəş açılması haqqıda bəyanatlarına baxmayaraq, yaşayış məntəqələrinə də zərbələr endirilir, bu da psixoloji effekt doğurur. Bu, münaqişənin Dağlıq Qarabağın hüdudlarından kənara çıxmasının göstəricisidir. Bu barədə “Amerikanın Səsi”nin Azərbaycan Xidmətinə Londonun Chatham House qeyri-hökumət təşkilatının eksperti Lourens Broers (Laurens Broers) bildirib.

Ermənistan və Azərbaycan arasında genişmiqyaslı müharibə Rusiya və Türkiyənin üzərinə daha böyük öhdəliklər qoyur.

Məntiqə əsasən, Moskva və Ankara kiminsə tərəfində müharibəyə cəlb edilməkdə maraqlı olmamalıdır. Amma döyüş əməliyyatları gücləndiyi təqdirdə onların Bakıya və Yerevana nə dərəcədə təsir göstərə biləcəyi aydın deyil.

O, beynəlxalq ictimaiyyətin insanlar ölməyə başladıqda münaqişəyə diqqət yetirməyə başlamasına təəssüfünü bildirib. Amma təkcə atəşkəslə kifayətlənmək olmaz. Fundamental məsələlərin tamamilə həllinə yönəlmiş yenilənmiş siyasi proses olmalıdır.

Tərəflərin təhlükəsizliyini təmin etmək üçün ATƏT-in heç vaxt keçirilməmiş Minsk konfransı (hələ 1992-ci ildə çağırılmalı idi) çağırılmalıdır. Cərəyan edən münaqişə çoxtərəfli diplomatiya üçün testdir, deyə ekspert bildirib. 

Bosniya və Herseqovinada münaqişənin nizamlanması üzrə Dayton sazişinə oxşar həll mümkündür? Bu suala cavabda Broers deyib ki, Dayton təkqütblü sülh məhsulu idi, həmin vaxt sülh prosesini yerinə yetirmək mümkün idi. Hazırda Qarabağ münaqişəsində iki maraqlı xarici qüvvə var, onlar regionda öz nüfuzlarını genişləndirmək istəyirlər. Onların ortaq məxrəcə gələ biləcəyinə inanmaq çətindir. Amma heç kimin udub-uduzmadığına və hər iki tərəfin ağır itkilər verdiyinə dair hiss onları birləşdirə bilər.

Sülhə nail olmaq üçün həm ermənilərin, həm də azərbaycanlıların maraqlarını təmin edən siyasi prosesə ehtiyac var, deyə Lourens qeyd edib. -16/06D-