Arxiv şəkli
Tanınmış hüquqşünas və media eksperti Ələsgər Məmmədli 2024-cü ilin mart ayından bəri saxlanıldığı həbsxanadan Azərbaycanlıların Həmrəylik Günü və Yeni il münasibətilə vətəndaşlara müraciət edib. Valyuta qaçaqmalçılığı ittihamı ilə həbs olunan Məmmədli bu ittihamları rədd edib və beynəlxalq media və insan hüquqları təşkilatları ittihamları siyasi motivli adlandırıb.
Səmimi müraciətində Məmmədli ötən ilin çətinliklərini dəyərləndirib və qarşıdan gələn ildə daha ədalətli və tolerant bir cəmiyyət üçün ümidlərini bölüşüb.
Əziz dostlarım, dəyərli həmvətənlərim!
2024-cü ili - sıxıntılarla və problemlərlə dolu bir ili geridə qoyuruq. Bu sıxıntılar yalnız mənim, yaxınlarımın və dostlarımın həyatında yaşanmadı. Təəssüf ki, çoxsaylı əqidədaşlarımızın, gənc jurnalistlərin və ictimai-siyasi fəalların da aqibətində bu çətinliklər özünü göstərdi. Mənə qarşı yönəlmiş hüquq terroruna baxmayaraq, ruhdan düşmək, ümidsizliyə qapılmaq və mübarizədən vaz keçmək mənim xarakterimə uyğun deyil.
Tamamilə günahsız olmağıma baxmayaraq, 10 aydır qapalı həbsxana divarları arasında yalnız girov kimi saxlanılıram. Həbsxana, hər nə qədər qapalı məkan olsa da, ölkədəki real vəziyyəti tam çılpaqlığı ilə görmək və dərk etmək üçün arzuolunmaz bir yerdir. Məni yaxından tanıyanlar bilir ki, hansı şəraitdə olsam da, azadlıq və obyektivlik hissimi heç vaxt itirmərəm. Təmaslarım vasitəsilə bilirəm ki, bu gün ölkəmizdə həbsdə olan insanların 90 faizdən çoxu günahsızdır. Normal bir məhkəmə-hüquq sistemi olsaydı, həbsxanalarda minlərlə günahsız insan bu məşəqqətli taleyi yaşamazdı.
Milli məsələlərdə həmrəy olmağımız nə qədər vacibdirsə, fərdi yanaşmalarda plüralist və tolerant olmaq da bir o qədər zəruridir. İnsan olmaq düşünməyi və bəzən fərqli düşünməyi tələb edir. Ümid edirəm ki, yeni təqvim ilində hər kəs özü kimi düşünməyənləri "düşmən", "casus" və ya "agent" kimi damğalamaqdan çəkinər, fərqli fikirlərə dözümlü yanaşar və cəmiyyətdə fikir plüralizmini təhlükə yox, inkişaf üçün zəruri bir amil kimi qəbul edər. Gerçək milli həmrəyliyə nail olmaq da bu yanaşmanı tələb edir.
Görünür, bizi qarşıda qeyri-müəyyənliklər və daha çox problemlərin ortaya çıxacağı bir il gözləyir. Eyni zamanda bu il, yeni ümidlərlə dolu ola bilər. Yeni ildə hər birinizə sağlamlıq, möhkəm iradə və qətiyyətli duruş arzu edirəm. Mənim diləyim isə heç vaxt ədalət hissinizi, azadlıq duyğunuzu itirməmək və azad iradənizi ifadə etməkdən çəkinməməkdir. Dünyadakı ən dəyərli hiss, insanın azadlıq duyğusudur. Azad insan olmadan azad cəmiyyət qurula bilməz. Hər birimiz əvvəlcə öz içimizdəki azadlığımızı boğan "zəncirlərdən" qurtulmalıyıq.
2025-ci ilin hər birimiz üçün yeni fürsətlər ili olmasını arzu edirəm. Bizi gözləyən sıxıntılardan qurtulmanın yolu gerçək dayanışma içində bir-birimizə dəstək olmaqdan və qarşılıqlı anlayışdan keçir. Hər birinizin həmrəylik gününü və yeni ilini təbrik edirəm. Bayramlarınız mübarək olsun!
Hörmətlə,
Hüquqşünas, media eksperti Ələsgər Məmmədli
Söz istəyirəm
-
Yanvarın 7-də prezident İlham Əliyevin yerli telekanallarla mətbuat konfransında Real TV-nin nümayəndəsi belə bir sual verdi: "Trampı bizimlə bir gəmidə görürsünüz..."
-
Çıxışıma təşəkkürlərlə başlamaq istəyirəm. Həyatımın hər mərhələsində yanımda olan ailəmə, yaxın qohumlarıma, dostlarıma təşəkkür edirəm. Şərlənərək həbs edildiyimə görə fiziki olaraq azadlıqdan məhrum edilsəm də, ilk andan bu günə qədər bütün maddi-mənəvi çətinliklərə baxmayaraq, onların yanımda olmasının nə qədər dəyərli olduğunu sözlərlə ifadə etmək mümkün deyil.
-
Azərbaycan hökümətinin 10 il bundan qabaq başladığı və bu günə qədər yarımçıq qalmış olduqca vacib bir islahatdan qısaca bəhs etmək istəyirəm.
-
Bizim cəmiyyətdə işıqlı insanların yeri günəşin altı olmur. Bizim cəmiyyətdə işıqlı insanların yeri günəşin altı olmur. Qaranlıq zirzəmilər olur. İşıq saçmalı olan insanlara küfr yağdırılır. Onların yeganə silahları parlaq ideyalarıdır. Onların yeganə suçu cəmiyyətdə dumanların altında gizlədilmiş həqiqətləri dartıb üzə çıxarmaq və onunla cəmiyyət üzvlərini tanış etmək cəsarəti ilə bağlıdır. Natiq Cavadlı bir jurnalist olaraq belə bir tarix şüuruna və maarifçi bir fəaliyyətə malik insan idi.
Rəy yaz