Təcridxanada Anar Məmmədlinin bel ağrısı şiddətlənib

Seçkilərin Monitorinqi və Demokratiyanın Tədrisi Mərkəzinin rəhbəri, 1 saylı Bakı İstintaq Təcridxanasında saxlanılan Anar Məmmədlinin belində ağrılar əmələ gəlib.

Bu barədə Turan-a onun vəkili Elmar Süleymanov bildirib.  Təcridxanada Anar Məmmədli ilə görüşdən sonra vəkil deyib ki, Məmmədlinin saxlanma şəraitilə bağlı şikayəti yoxdur. Ancaq fəal belində ağrının olduğunu bildirib.

"Mən bununla bağlı rəhbərliklə (istintaq təcridxanası) danışdım. Dedilər ki, Anar Məmmədlini lazımi döşəklə təmin edəcəklər", - vəkil deyib.

Məmmədlinin işi üzrə istintaqa gəlincə, Süleymanov deyib: "İstintaq hərəkətləri ləng aparılır, amma aparılır".

Bundan əvvəl Məmmədlinin yaxınları bildirmişdilər ki, onurğa yırtığı səbəbindən onun ortopedik döşəyə ehtiyacı var, lakin təcridxanada onu bu yataq ləvazimatı ilə təmin etməyə imkan vermirlər.

*Anar Məmmədli aprelin 30-da həbs edilib. O, qabaqcadan əlbir olan bir qrup şəxs tərəfindən qaçaqmalçılıqda (Azərbaycan Cinayət Məcəlləsinin 206.3.2-ci maddəsi) ittiham olunub. Əvvəlcə "Abzas Media işi" üzrə cəlb edilmişdi.

Sonradan onun işi ayrıca icraata götürülüb.

Çoxsaylı beynəlxalq təşkilat, ABŞ Dövlət Departamenti Azərbaycan hökumətini Anar Məmmədlini və həbsdə olan digər jurnalistləri və fəalları dərhal azad etməyə çağırıb.

Xatırladaq ki, son bir neçə ayda 17 fəal və jurnalistə qarşı cinayət işi açılıb, onlardan 15-i həbsdədir.