Təhsil Nazirliyinin tələbələrin tələblərinə cavabı

Bakı/01.06.20/Turan:  Təhsil Nazirliyində "İmtahanları ləğv et!" və "Ödənişi ləğv et!" şüarı altında petisiyanı təqdim etmiş bir qrup şəxsin müraciətinə baxılıb.

Nazirliyinin ictimaiyyətlə əlaqələr şöbəsindən Turan-a bildiriblər ki, nazirliyə gələnlər NİDA Hərəkatının üzvləri olub. Onları 20-yə yaxın media nümayəndəsi müşayiət edib. 

3 tələbə - BDU-nun şərqşünaslıq fakültəsinin II kurs tələbəsi Rüstəm İsmayılbəyli, İqtisad Universitetinin maliyyə və mühasibatlıq fakültəsinin IV kurs tələbəsi Allahverdi Həsənov və Dövlət Dillər Universitetinin IV kurs tələbəsi Zərifə Novruzovanı nazirlikdə qəbul ediblər.

R.İsmayılbəyli bütün imtahanların ləğv olunması barədə yazılı, imzasız müraciət təqdim edib.

A.Həsənov bildirib ki, əhalinin sosial baxımdan həssas qrupunun nümayəndəsi kimi təhsil haqqını ödəməkdən azad edilmək üçün Təhsil Nazirliyinin portalında qeydiyyatdan keçə bilməyib.

Tələbələrə bildiriblər ki, imtahan sessiyası qaydası Nazirlər Kabineti tərəfindən müəyyən edilib. Söhbət davam 20 dəqiqə davam edib.

Görüşdə iştirak edən Zərifə Novruzova “Azadlıq” radiosuna bildirib ki, onlar şəxsi tələblərlə deyil, minlərlə tələbənin adından gəliblər.

Polis tərəfindən saxlanılan tələbələr isə saat 17:00-dək polis şöbəsində qalıblar. --06D-