Ter-Petrosyan Sarqsyanı Qarabağı tanımağa çağırıb?

Yerevan/11.04.16/Turan-Arminfo: “Mənim Ermənistan prezidenti Serj Sarqsyanla görüşüm gözlənilməz olmamalıydı, çünki hakimiyyətlə ciddi fikir ayrılığının olmasına baxmayaraq, mən həmişə Dağlıq Qarabağa təhlükə anında analoji təşəbbüslə çıxış etmişəm”, - Ermənistanın keçmiş prezidenti Levon Ter-Petrosyan  iLur.am-a müsahibəsində bildirib.

Aprelin 5-də o, Sarqsyana məktub yazıb: “Serj, düşünmürsən ki, yaranmış vəziyyətdə bizim görüşümüz cəmiyyətə müsbət təkan verəcək,  erməni xalqı və beynəlxalq birlik tərəfindən yaxşı qarşılanacaq?  Təbii ki, söhbət vəziyyətdən şərəflə və siyasi itkisiz çıxmaqdan, həmçinin Ermənistan tərəfindən DQR-in tanınması ideyasının məqsədəuyğunluğundan,  və Ermənistan Respublikası ilə DQR arasında qarşılıqlı hərbi yardım haqqında müqavilənin imzalanmasından gedir.

Bu ideyalar təbliğat fəndi kimi əsasa malikdir, lakin onların gerçəkləşdirilməsi anın tələbinə impulsiv cavabdan yox, ciddi müzakirələr və dəqiq hesablamalarlardan irəli gəlməlidir. Görüşün vaxtını və yerini sənə həvalə edirəm. Görüş faktı açıqlanarsa bunun mənim təşəbbüsümlə olduğunu deyə bilərsən”.

Sonrakı günlər Sarqsyan Almaniyaya getməli  olduğundan telefonla Ter-Petrosyana çatdırıb ki, görüş o qayıtdıqdan sonra ilk prezidentin evində olacaq.

Ter-Petrosyan qeyd edib ki, başqa ölkələrdə xarici təhlükələr zamanı  daxili siyasi fikir ayrılığı bir qayda olaraq kənara qoyulur və sağlam siyasi və ictimai qüvvələrin səyləri milli təhlükəsizliyin möhkəmləndirilməsinə və təhlükələrin qarşısının alınmasına yönəlir. 

Aprelin 9-da Serj Sarqsyan Ter-Petrosyanla Qarabağda vəziyyəti, danışıqlar prosesinin inkişafını, həmçinin bu cür çağırışların qarşısının alınması üçün milli konsolidasiyanın vacibliyini müzakirə edib. 

Aprelin 3-də Levon Ter-Petrosyan özünün Facebook səhifəsində yazıb ki, Azərbaycan başa düşməlidir ki, Ermənistanda istənilən daxili siyasi vəziyyətdə Qarabağa hərbi qəsd erməni xalqının kollektiv müqavimətilə qarşılacaşaq. “Hərbi təhlükə olduğu halda mən bizim tərəfdaşlarımızı müvəqqəti olaraq siyasi fəaliyyəti dayandırmağa və vətənin müdafiəsi işinə keçməyə çağıracağam”, - o yazıb.

Ermənistanın ikinci prezidenti Robert Köçəryan hələlik bununla bağlı fikrini bildirməyib.-0-