Texaslı iki konqresmen 907-ci düzəlişin ləğvinə çağırıb

Texas ştatından iki konqresmen Ted Po və Cen Qrin Nümayəndələr Palatasının spikerinə müraciət edərək Azərbaycana dövlət yardımının göstərilməsini qadağan edən “Azadlığa dəstək aktı”na 907-ci düzəlişin ləğvinə çağırıblar.

Müraciətdə deyilir ki, 20 il əvvəl prezident Buş (böyük) “Azadlığa dəstək aktı”nı imzalayıb. Sənədə əsasən keçmiş SSRİ respublikalarına demokratiya quruculuğuna görə vəsait ayrılır. Sonradan bu akta 907-ci düzəliş edilib ki, bu da Azərbaycana bu cür yardımın göstərilməsini qadağan edir. Bu ölkə ABŞ-ın ciddi tərəfdaşıdır və 2001-ci ilin sentyabrından sonra Əfqanıstanda qərb qoşunlarının təchizatı üçün öz hava məkanını açıb. 

7 milyard barel həcmində təsdiqlənmiş neft ehtiyatına malik Azərbaycan Avropanın enerji təhlükəsizliyinin təminatında mühüm rol oynayır.

Ötən illər ərzində ABŞ administrasiyası bütün prezidentlərin dövründə bu düzəlişin ləğvini təklif edib. Konqres bu arxaik düzəlişdən imtina etməli və onu ləğv etməlidir, konqresmen Po yazır.

Öz növbəsində konqresmen Qrin qeyd edir ki, ABŞ və Azərbaycan arasında əməkdaşlıq bütün istiqamətlərdə - hərbi, iqtisadiyyat, kəşfiyyat, biznes və mədəni sahələrdə inkişaf edir.

907-ci düzəliş ləğv edilmədən bu münasibətlərin genişlənməsi mümkün deyil. Odur ki, hər il prezidentlər bu düzəlişin müvəqqəti ləğvinə dair fərmanı uzadırlar.  

“Amerika şirkətləri Azərbaycanın təbii resurslarından mənfəət əldə etdiyi, bu ölkənin əsgərləri beynəlxalq  terrorizmə qarşı mübarizədə bizim əsgərlərlə yanaşı dayandığı halda müttəfiqimizə “izqoy ölkə” kimi yanaşmaq düzgün deyil.  

907-ci düzəliş Amerikanın Xəzər regionundakı yaxın müttəfiqinə “şillə”dir.  Mən öz həmkarlarımı bu düzəlişi mümkün qədər tez ləğv etməyə və dostumuz Azərbaycanı dəstəkləməyə çağırıram”, - konqresmen Qrin yazır.

Xatırladaq ki, 907-ci düzəliş 1992-ci ilin oktyabrında erməni lobbisinin təşəbbüsü ilə edilib. Düzəlişin mətnində deyilir ki, Qarabağ münaqişəsi nizamlanmayana kimi ABŞ Azərbaycana dövlət yardımı göstərməyəcək.-25D-