Tillerson: «ABŞ Qarabağ münaqişəsinin tezliklə həllində maraqlıdır»

  ABŞ Dağlıq Qarabağ münaqişəsinin tezliklə sülh yolu ilə  həllində maraqlıdır. Bunu ABŞ-ın dövlət katibi Reks Tillerson bildirib.

R.Tillerson və Azərbaycan XİN rəhbəri Elmar Məmmədyarov Azərbaycanla ABŞ arasında diplomatik münasibətlərin qurulmasının 25 illiyi münasibətilə təbrik məktubu mübadiləsi həyata keçiriblər.

Dövlət katibi xatırladıb  ki, Azərbaycan 11 sentyabr hadisələrindən sonra ABŞ-a dəstək verən ilk ölkələrdən biridir.

Tillerson Vaşinqton və Bakı arasında sıx əməkdaşlığın olduğunu qeyd edib.

“ABŞ Azərbaycanın öz iqtisadiyyatının şaxələndirilməsi, iqtisadi imkanlarının artıtılması istiqamətində səylərinə dəstək verir”, - dövlət katibi vurğulayıb.

“Azərbaycan münaqişənin həlli istiqamətində ABŞ-ın ədalətli vasitəçiliyinə etibar edir və münaqişənin BMT Təhlükəsizlik Şurasının müvafiq qətnamələri əsasında sülh yolu ilə nizamlanmasına tərəfdardır”, - öz növbəsində E.Məmmədyarov bildirib.

Nazir Azərbaycanın Avropanın enerji təhlükəsizliyi və enerji mənbələrinin şaxələndirilməsinə töhfə verməklə ABŞ ilə enerji məsələləri üzrə yaxından əməkdaşlıq etdiyini bildirib.

XİN rəhbəri iki ölkənin terrorizmə qarşı mübarizə və kütləvi qırğın silahlarının yayılmaması üzrə uğurlu əməkdaşlıq etdiyini qeyd edərək Azərbaycanın ABŞ-ın Əfqanıstandakı əməliyyatlarına dəstək verən ilk ölkələrdən biri olduğunu vurğulayıb.

Azərbaycan və ABŞ arasında diplomatik əlaqələr 1992-ci il fevralın 28-də qurulub. Azərbaycanın ABŞ-dakı səfirliyi 1992-ci ilin martında, ABŞ-ın Azərbaycandakı səfirliyi isə 1992-ci ilin noyabrında açılıb.

İndiyədək iki ölkə arasında 76 sənəd imzalanıb.06D—