Tofiq Yaqublunun vəziyyəti pisləşib

Milli Şuranın və Müsavat Partiyasının üzvü, 1 saylı Bakı İstintaq Təcridxanasında saxlanılan Tofiq Yaqublunun vəziyyəti pisləşib. Buna baxmayaraq, hələ də tibbi müayinə aparılmır. Bu barədə Turan-a siyasətçinin qızı Nigar Həzi atası ilə telefon danışından sonra bildirib.

“Nə vaxtdır ki, atam səhhətindəki ciddi problemlə bağlı müayinə olunmalıdır. Onun daxili orqanında şiş ehtimalı var. Tez bir zamanda müayinə olunub müalicə yazılmalıdır. Çünki problem getdikcə dərinləşir. Artıq bir həftədən çoxdur ki, Penitensiar Xidmətə müraciət etmişik. Deyirlər, məsələ həll olunacaq, amma hələ də atam müayinəyə aparılmayıb”, - Nigar Həzi deyib.

Penitensiar Xidmət Tofiq Yaqublunun qızının bəyanatı ilə bağlı Turan-ın sorğusuna hələ cavab verməyib.

Xatırladaq ki, Tofiq Yaqublu 2023-cü il dekabrın 14-də dələduzluq, saxtalaşdırma, rəsmi sənədlərin qanunsuz hazırlanması və saxta sənədlərdən istifadə ittihamları ilə həbs edilib.

Tofiq Yaqublu ittihamları uydurma adlandırıb. Siyasətçi əvvəllər də dəfələrlə cinayət və inzibati təqiblərə məruz qalıb. Beynəlxalq təşkilatlar onu vicdan məhbusu kimi tanıyıblar.