Toplantı bitib, müzakirələr yarımçıq qalıb

İctimai Palatanın (İP) Koordinasiya Şurasının (KŞ) dünən günorta başlayan toplantısı saat 20:00 radələrində bitib.  

Struktur islahatları və seçkilərə münasibətlə bağlı aparılan müzakirələr başa çatmayıb. Müzakirələrin KŞ-nin adi qaydada keçirilən çərşənbə günü toplantısında davam etdirilməsi haqda qərar qəbul edilib. 

Müzakirələrdə İctimai Palatanın prezident seçkilərinə qatılması və ya qatılmaması haqda birmənalı mövqe yoxdur. Ehtiyatlı müzakirələr göstərir ki, İP iqtidarın Seçki Məcəlləsinə dəyişiklik edərək demokratik seçki keçirəcəyinə ümidli deyil. Belə antidemokratik seçki mühitində isə İP seçkilərdə iştirak etmək istəmir. Toplantıdakı müzakirələrdə aparıcı müxalifət düşərgəsinin bu seçkilərdə prezidentliyə vahid namizədinin kim ola bilməsi məsələsinə ümumiyyətlə toxunulmaması da qurumun seçkilərə birmənalı olmayan münasibətinin göstəricisi sayıla bilər. Baxmyaraq ki, müxalifət qəzetlərində artıq “vahid namizəd” kimi Xalq Cəbhəsi partiyasının sədri Əli Kərimlinin və Müsavat Partiyasının başqanı İsa Qəmbərin adları hallandırılır. Amma bu adlar tərəflərin və onlara dəstəkçi olanların maraqları çərçivəsində çəkilir. Hər iki partiya lideri isə bu haqda danışmağın vaxtından tez olduğunu deyirlər.  

Müxalifətin ünlü simalarından Pənah Hüseyn bu məsələdə vahid yox,  “əsas namizəd” termininə üstünlük verir, hər hansı ad çəkmədən bu namizədi indidən müəyyən etməyin vacib olduğunu bildirir.   

Müzakirələr göstərib ki,  dekabrın sonuncu dekadası və ya 2013-cü ilin yanvarında gözlənilən İctimai Palatanın sessiyasına qurum ortaq mövqe əks edən kompromis bir sənədlə çıxmağı nəzərdə tutur. Amma bu sənədin mahiyyətinin nədən ibarət olacağı haqda indidən hər hansı bir mülahizə belə irəli sürmək mümkün deyil.    

Struktur islahatlarına gəlincə, seçki öncəsi Palata daxilində bir sıra bölmələrin yaradılması nəzərdə tutulur. Bundan əlavə, 2011-ci ilin əvvəlində bir il müddətinə seçlmiş KŞ-nin qarşıdakı aylarda yeni tərkibinin seçkisinin olacağı gözlənilir.-05B-