Tural Abbaslı üç ay həbs cəzasına məhkum oluna bilər

Bakının Nəsimi rayon məhkəməsində Müsavat Partiyasının gənclər təşkilatının sədri Tural Abbaslının işinə baxılması avqustun 7-nə təyin edilib. O, İnzibati Xətalar Məcəlləsinin 313.2.3-cü (ictimai işlərin yerinə yetirilməsindən yayınma) maddəsi ilə ittiham olunur.

Abbaslının özünün Turan-a verdiyi məlumata görə, o, 3 aya qədər azadlıqdan məhrum edilə bilər.

Nəsimi rayon məhkəmə qərarlarının icrası şöbəsinə 41 saylı Mənzil-Kommunal İstismar Sahəsinin rəhbərliyindən Abbaslının inzibati cəza kimi ona təyin edilmiş 220 saat ictimai işləri yerinə yetirmədiyi haqqında məktub daxil olub. Lakin bu, həqiqətə uyğun deyil. Abbaslı 41 saylı MKİS-yə baş çəkib və orada qeyd edilib. Lakin ona heç bir işi yerinə yetirməyi təklif etməyiblər.

Müsavat partiyası Abbaslının işi üzrə məhkəmə prosesinin tələsik keçirilməsini onun seçki kampaniyası dövründə cəmiyyətdən təcrid edilməsi kimi qiymətləndirir. Partiya gənc fəala qarşı təzyiqlərə son qoyulmasını tələb edir.

Xatırladaq ki, Abbaslı və bir sıra digər fəallar bu il yanvarın 12-də Bakının mərkəzində icazəsiz mitinqdə iştiraka görə cərimə olunub. Məhkəmə onları 400-600 manat cərimə edib, lakin bəzi fəallar bu cəriməni ödəməkdən imtina ediblər. Buna görə onlar icbari işlərə cəlb edilib. -16D06-