Turan-ın müraciəti: Ermənistan minalanmış ərazilərin xəritələrini Azərbaycana verməlidir

Bakı/04.06.21/Turan: "Kəlbəcərdə iki jurnalistin və yerli icra hakimiyyəti nümayəndəsinin həyatına son qoyan faciə ölkə ictimaiyyətini İkinci Qarabağ Müharibəsi günlərinə qaytardı və bizim hamımızı müharibənin hələ bitmədiyini anlamağa məcbur etdi", - Turan İnformasiya Agentliyinin kollektivinin beynəlxalq hüquq- müdafiə və jurnalist təşkilatlarına müraciətində deyilir.

"Üç nəfərin ölümü və dörd nəfərin yaralanması öz hərəkətləri ilə gərginliyin saxlanmasına xidmət edən və iki xalq arasında sülhə nail olunmasına mane olan destruktiv qüvvələrin cinayətkar əməlinin nəticəsidir.

Turan agentliyi iki həmkarını – Fərhad Kərimovu və Adil Bünyadovu itirib. Onlar da hərbi münaqişələrin qurbanları olub. Odur ki, öz həmkarını və yoldaşını itirməyin nə demək olduğunu yaxşı bilirik. Ancaq müharibənin olmadığı vaxtda jurnalistlərin həlak olması ikiqat ağırdır və ədalətsizlikdir.

Beynəlxalq qurumlardan olan jurnalist həmkarlarımızı məsələni qaldırmağa və Ermənistandan azad edilmiş ərazilərdə minalanmış sahələrin xəritələrini verməyi tələb etməyə çağırırıq.

Beynəlxalq birlik Azərbaycanı  müharibədən sonra saxlanılmış şəxsləri azad etməyə və YUNESKO nümayəndələrini regiona buraxmağa çağırmaqla kifayətlənməməlidir. Əgər bu minalar zərərsizləşdirilməsə, beynəlxalq təşkilatların əməkdaşları  da mina partlayışlarının növbəti qurbanları ola bilər", - müraciətdə deyilir.-02В-