"Türk dünyasının müstəqil dövlətçilik ənənələri" mövzusunda beynəlxalq konfrans

Bakı/29.06.18/Turan: İyunun 28-də Azərbaycan Milli Elmlər Akademiyasında "Türk dünyasında müstəqil dövlətçilik ənənələri və müasir inkişaf problemləri" mövzusunda beynəlxalq elmi konfrans açılıb, bu barədə AMEA-nın ictimaiyyətlə əlaqələr şöbəsi məlumat verib.

Tədbirdə Azərbaycan, Türkiyə, Qazaxıstandan, Rusiya Federasiyasının Tatarıstan və Başqırdıstan respublikalarından və digər ölkələrdən alimlər və ekspertlər iştirak edir.

AMEA prezidenti, akademik Akif Əlizadə türk xalqlarının çoxəsrlik elmi-mədəni əlaqələri tarixinin öyrənilməsi nöqteyi-nəzərdən konfransın əhəmiyyətini qeyd edib. Türkdilli ölkələr arasında elm və təhsil sahəsində əməkdaşlıq haqqında danışan Əlizadə bu əlaqələrin genişlənəcəyindən əmin olduğunu bildirib.

Beynəlxalq Türk Mədəniyyəti və İrsi Fondunun rəhbəri Günay Əfəndiyeva rəhbərlik etdiyi təşkilatın fəaliyyəti haqqında danışıb, Fondun əsas məqsədinin türkdilli xalqlar arasında əlaqələri möhkəmləndirmək, türk dünyasının mədəni irsini öyrənmək və təbliğ etmək olduğunu deyib.

Beynəlxalq Türk Akademiyasının daimi katibi Ashat Kesikbayev qeyd edib ki, hələ 2009-cu ildə Qazaxıstan prezidenti Nursultan Nazarbayev türk dünyasının araşdırılması üçün beynəlxalq elmi mərkəz yaratmaq təklifi irəli sürüb.

Türkiyə Elmlər Akademiyasının prezidenti Ahmet Cevat Acar türk dünyasında elmi əməkdaşlığın əhəmiyyəti haqqında məruzə ilə çıxış edib, Tatarıstan Elmlər Akademiyasının prezidenti Myakzum Salahov Tatarıstan və Azərbaycan arasında mədəni əlaqələrdən, Başqırdıstan Elmlər Akademiyasının prezidenti Alfiz Qayazov Turan məkanının mədəni irsi haqqında danışıb.

Konfrans davam edir. -02D-