Türkiyə Gürcüstanın NATO-ya inteqrasiyasını dəstəkləyir

Türkiyə parlamentinin Xarici Əlaqələr Komitəsi öz müttəfiqlərini Varşavada keçiriləcək NATO sammitində (8-9 iyul) Gürcüstanın Alyansa inteqrasiya cəhdlərini dəstəkləməyə çağırıb, “Anadolu” agentliyi bildirib.

Bəyanatda Türkiyə və Gürcüstan arasında “strateji xarakter daşıyan münasibətlər”in yüksək səviyyəsi qeyd olunur. Həmçinin sənəddə Avroatlantika regionunda təhlükəsizliyin möhkəmləndirilməsi işində NATO-nun “açıq qapılar” siyasətinə toxunulur. 

“Ölkənin öz iradəsi və “açıq qapılar” siyasətinə uyğun olaraq NATO-ya daxil olmaq cəhdləri üçüncü tərəf üçün heç bir təhlükə və risk doğurmur”, - bəyanatda deyilir.

Türkiyəli deputatlar demokratik dəyərlərin irəliləməsi kontekstində Avroatlantika regionunda sabitlik və təhlükəsizlik məsələsində Gürcüstanın əhəmiyyətinə diqqət yetirirlər.

“Komitə Gürcüstanın müstəqilliyini, suverenliyini, beynəlxalq birlik tərəfindən qəbul edilmiş sərhədlərini və ərazi bütövlüyünü dəstəkləyir. Həmçinin Komitə Uels sammitində qəbul olunmuş “NATO-Gürcüstan” razılaşmasının reallaşması üzrə Gürcüstanın gözləntilərinə uyğun olaraq zəruri tədbirlərin həyata keçirilməsinə yardım göstərməyə hazırdır”, - sənəddə bildirilir.-02D-