Türkiyə KİV-ləri Davutoğlunun Yerevana səfəri haqqında

Dekabrın 12-də Türkiyə XİN rəhbəri Ahmet Davutoğlunun Yerevana səfəri zamanı Ankaranın Ermənistanın Dağlıq Qarabağ ətrafında işğal edilmiş 7 Azərbaycan rayonundan ən az ikisini azad etməsi şərtilə iki ölkə arasında sərhədlərin açılması haqqında təklif irəli sürəcəyi gözlənilir, bu barədə Türkiyənin “Akşam” qəzeti yazır.

Mənbənin məlumatına görə, Davutoğlunun Yerevana səfəri zamanı QİƏT iclası çərçivəsində onun Ermənistan prezidenti Serj Sarkisyan və xarici işlər naziri Edvard Nalbandyanla görüşü planlaşdırılır.

Məlumata əsasən, Türkiyənin Davutoğlunun Yerevana apardığı təklifləri noyabrda Azərbaycan və Ermənistan prezidentləri İlham Əliyev və Serj Sarkisyanın Vyana görüşündən sonra formalaşdırılıb. Prezidentlərin sonuncu görüşünü əlverişli imkan kimi qiymətləndirən rəsmi Ankara Ermənistanla barışıq üçün addımlar atmağı qərara alıb.

Xatırladaq ki, bir müddət əvvəl Habertürk agentliyi Davutoğludan sitat gətirərək, Türkiyənin Ermənistanla münasibətləri yalnız Yerevanın Azərbaycanın ərazi bütövlüyünü tanımasından sonra bərpa edə biləcəyini bildirirdi. -02D-