Türkiyə klinikası İsa Qəmbərin səhhəti barədə

Bakı/07.03.18/Turan: Müsavat Partiyasının keçmiş başqanı İsa Qəmbər Ankaradakı Hacettepe xəstəxanasının nevrologiya bölməsində "pnevmoniya nəticəsində yoluxduğu bir infeksiyadan" müalicə olunur. Bu barədə BBC-nin Azərbaycan xidmətinə klinikadan bildiriblər. "İ. Qəmbər fevralın 28-də sərnişin təyyarəsi ilə Mərkəzi Klinikanın bir həkiminin müşayiəti ilə Bakıdan gətirilib",- klinikadan deyiblər.

Mənbənin məlumatına görə, 3 gün əvvəl İ. Qəmbər hərarəti yüksəldiyindən profilaktik məqsədlə reanimasiya şöbəsinə keçirilib.

"Xəstədə tənəffüs sıxıntısı, nəfəs darlığı oldu. Pnevmoniyası ağırlaşmasın deyə reanimasiyaya alındı. Amma reanimasiyada elə bir sıxıntı yaşanmadığı üçün təkrar palataya aldıq", - mənbə bildirib.

Xəstəxananın həkimləri İ. Qəmbərin ümumi sağlıq durumunun "yaxşı" olduğu qənaətindədirlər.

Lakin bununla belə, İ. Qəmbərin beyin qanaması ilə bağlı ciddi nəzarətə ehtiyacı var.

"Bakıda beyin qanaması keçirib. Qanaması böyükdür, amma vəziyyəti stabildir. Bütün nevroloji müayinələri normaldır. Danışır. Yemək yeyir. Hərəkətdədir. Beyin qanaması ona fiziki mənada heç bir təsir göstərməyib. Beyin qanaması ilə bağlı hər hansı nevroloji defisiti yoxdur. Gücü, qüvvəti yerindədir. Həftə içində Bakıdakı hər hansı xəstəxanaya köçürməyi düşünürük. Sadəcə, onun istirahət etməsi lazımdır", - mənbə əlavə edib.

"İsa Qəmbərin Bakıda müalicəsinin stasionar şəkildə davam etdirilməsi hansı zərurətlə bağlıdır" sualına Hacettepe Universiteti xəstəxanasının nevrologiya bölməsindəki mənbə deyib:"Yoluxduğu infeksiya ilə bağlı qəbul etdiyi antibiotik dərmanları damardan aldığı üçün İsa Qəmbərin müalicəsinin evdə izlənməsi çətin ola bilər deyə xəstəxana şəraitində müalicəsinin davam etdirilməsi uyğun görülüb. Azərbaycana getdikdən bir ay sonra təkrar kontrol müayinəsi aparılacaq".

"İsa Qəmbər Ankaraya Türkiyədəki Azərbaycan cəmiyyətinin və dostlarının dəstəyi ilə gətirilib", Ankarada yerləşən Azərbaycan Kültür Dərnəyinin başkan müavini İsa Yaşar Tezel BBC Azərbaycan xidmətinə bildirib.-03D-