Türkiyə Quru Qoşunları komandanının Bakıya səfəri barədə

Türkiyə Quru Qoşunlarının komandanı general Tuncay Altuğun Azərbaycana səfəri davam edir. Dünən o, Azərbaycan Silahlı Qüvvələri Quru Qoşunlarının komandanı, müdafiə nazirinin müavini Hikmət Mirzəyevlə görüşüb.

Azərbaycan Silahlı Qüvvələrinin Türkiyə Silahlı Qüvvələri modelinə uyğunlaşdırılmasına dair məsələlər müzakirə olunub, Müdafiə Nazirliyinin mətbuat xidməti bildirib.

Sonra Türkiyə nümayəndə heyətinin Azərbaycan Hərbi Hava Qüvvələrinin komandanı Namiq İslamzadə ilə görüşü olub.

Görüş zamanı Azərbaycan Hərbi Hava Qüvvələri arsenalının gücləndirilməsində ikitərəfli hərbi əməkdaşlığın əhəmiyyəti vurğulanıb.

Daha sonra türkiyəli qonaqlar Azərbaycan Hərbi Dəniz Qüvvələrinin qərargahında olub, komandan vəzifəsini müvəqqəti icra edən Şahin Məmmədov ilə görüşüblər.  Görüşdə birgə təlimlərin, qarşılıqlı təcrübə mübadiləsinin əhəmiyyəti, eləcə də maraq doğuran digər məsələlər barədə ətraflı fikir mübadiləsi aparılıb.