Türkiyə XİN Acarıstanda yeni məscid tikilməsini istəyir

Tbilisi/28.03.13/Turan-BS PRESS: Türkiyənin xarici işlər naziri Əhməd Davudoğlu martın 28-də Batumidə birgə mətbuat konfransında çıxış edərkən Acarıstanda daha bir məscid tikiləcəyinə ümid etdiyini bildirib.

“Acarıstanda 100 minə yaxın müsəlman yaşayır. Onlar Gürcüstan vətəndaşıdırlar və məscidləri olmasını istəyirlər. Bidzina İvanişvili (Gürcüstanın baş naziri) bu məsələni öz öhdəsinə götürüb. Ümid edirəm ki, Gürcüstanda məscid tikiləcək”, deyə Davudoğlu bildirib.

Onun sözlərinə görə, Türkiyə tərəfi öz növbəsində Türkiyə ərazisində Gürcüstan mədəniyyət abidələrinin bərpasını öz üzərinə götürür.

Gürcüstanın XİN rəhbəri Maya Pancikidze tezliklə “Keçmiş SSSR hakimiyyəti tərəfindən XX əsrin 40-cı illərində Gürcüstan SSR-dən məcburi köçürülmüş şəxslərin qaytarılması haqqında” qanuna düzəlişlər işlənib hazırlanacağına ümid etdiyini bildirib.

Gürcüstan parlamentinin 2007-ci ilin iyulunda qəbul etdiyi qanuna əsasən, Gürcüstandan zorla köçürülmüş şəxslər vətənə qayıtmaq və repatriant statusu almaq hüququ qazanıblar.

“Bu mərhələdə biz təxminən 900 iş üzərində işləyirik. Ədliyyə Nazirliyi bu məsələ ilə bağlı qanunvericiliyə dəyişikliklər üzərində işləyir. Gürcüstanın yeni hökuməti nəhayət ki, bu məsələni tənzimləməyi qərara alıb, ona görə ümid edirəm ki, bu dəyişikliklər tezliklə həyata keçiriləcək”, deyə Pancikidze bildirib.

Onun sözlərinə görə, məshəti türklərindən ümumilikdə təxminən 5 min ərizə daxil olub.

“Məshətilər sosialist rejimi ilə əlaqədar ölkədən (Gürcüstan) qovulmuşdular. Bu, onların torpaqlarıdır və Türkiyə bu məsələnin həllinə öz töhfəsini vermək istəyir, deyə Davudoğlu qeyd edib.

Gürcüstan Avropa Şurasına daxil olarkən Qazaxıstanda, Rusiyada, Özbəkistanda, Ukraynada və Azərbaycanda yaşayan məshəti türklərini vətənə qaytarmaq öhdəliyi qəbul edib.

İslama xidmət edən məhsəti türkləri 1944-cü ildə Sovet hökumətinin qərarı ilə Gürcüstanın Türkiyə ilə sərhəd rayonlarından, xüsusən Ahalkalaki rayonundan deportasiya ediliblər. -02D-