Eldar Həsənov Serbiyaya səfir göndərilib

Dövlət başçısının sərəncamı ilə Azərbaycanın Rumıniyadakı səfiri Eldar Həsənov Serbiyada səfir təyin edilib. Eyni zamanda Monteneqro və Bosniya Herseqovinada səfir olaraq qalıb.

Bundan əvvəl E.Həsənov dövlət başçısına məktubla müraciət edərək iş yükünün çox olması ilə əlaqədar geri çağırılmasını xahiş etmişdi. Məktubun məzmunundan hiss olunurdu ki, E.Həsənov Bakıya qayıtmaq və Azərbaycanda vəzifə almaq istəyir. E.Həsənovun bu istəyi “təsadüfən” bəzi KİV-ə məlum olub və onlar da E.Həsənovun hansı vəzifəni ala biləcəyi ilə bağlı müxtəlif fikirlər yürüdüblər. Lakin keçmiş baş prokurorun İlham Əliyevə sadıqliyi barədə eyhamları eşidilməyib. Belə ki, ölkə başçısı E.Həsənovun iş yükünün çox olması ilə bağlı şikayətini nəzərə almayıb və ona daha böyük tapşırıb.

E.Həsənov mərhum prezident Heydər Əliyevin dövründə baş prokuror postunu tutub. Sonra vəzifəsindən çıxarılaraq istefaya göndərilib. Bir müddətdən sonra Bakıdan uzağa diplomatik işə göndərilib.

Ötən illərdə E.Həsənov Bakıya sadiqliyini və lazımlı olduğunu sübut etmək üçün Bakıya qayıtmağa dəfələrlə cəhd göstərib. Lakin Prezident Administrasiyasında ona qarşı inam həmişə sual altında olub. Hələ 90-cı illərin sonlarında Prezident Administrasiyasından mətbuata sızan məlumata görə, baş prokuror Eldar Həsənov və MTN rəhbəri Namiq Abbasov özlərini “düzgün aparmırlar” və Təhlükəsizlik Şurasının iclasında buna görə tənqid olunublar. Bu xəbər həmin şəxsləri gözdən salmaq və vəzifədən kənarlaşdırmaq üçün mətbuata qəsdən sızdırılmışdı və tezliklə də bu, baş verdi.

Bir neçə il öncə prezident İlham Əliyev guya ki, E.Həsənovu geri qaytarmağı qərara alıb. Lakin yenə də mətbuata sızan məlumata görə, prezidentə bunu etməmək tövsiyə olunub. “O, hakimiyyəti ələ keçirmək üçün gəlir” deyən Administrasiyasının yüksək vəzifəli nümayəndəsi İ.Əliyevi xəbərdar edib. -03D-