Türkiyədə hakim partiya fövqəladə konqres keçirir

Bakı/24.03.21/Turan: Martın 24-də Ankara İdman Kompleksində Türkiyənin hakim Ədalət və İnkişaf Partiyasının genişləndirilmiş konqresi keçirilir. Bu barədə “Anadolu” Agentliyinin yaydığı məlumatda deyilir.

Məlumata görə, Türkiyə prezidenti Rəcəb Tayyib Ərdoğanın “2023-cü ilin manifesti" adlı geniş nitq söyləyəcəyi gözlənilir.

Prezident Ərdoğan konqresdə 2023-cü il seçkilərinə dair bir yol xəritəsini açıqlayacaq. Onun çıxışında insan hüquqları üzrə fəaliyyət planına və iqtisadi islahatlara toxunacağı nəzərdə tutulur.

Konqresdə partiya fəaliyyəti ilə bağlı bir sıra mühüm qərarların qəbul olunması da gözlənilir. Belə ki, İdarə Heyəti üzvlərinin sayı 50-dən 75-ə qaldırılacaq, ehtiyat üzvlərlə birlikdə 100 nəfərdən ibarət olacaq. İdarə Heyətində keçmiş nazir və deputatlarla yanaşı, yeni şəxslərin təmsil olunacağı, gənclərin və qadınların sayının artırılacağı gözlənilir.

Konqresdə Ədalət və İnkişaf Partiyasının yeni Nizamnaməsinin qəbul ediləcəyi də diqqət mərkəzindədir.

Partiyanın Mərkəzi Aparatında bəzi dəyişikliklərin aparılması, yeni strukturların yaradılması planlaşdırılır.

“Bu dəyişikliklərdə, xüsusən də Ədalət və İnkişaf Partiyası rəhbərliyinə yeni şəxslərin gətirilməsində əsas məqsəd partiyanı 2023-cü ildə keçiriləcək prezident və parlament seçkilərinə hazırlamaqdır”, -məlumatda qeyd edilir.

Ədalət və İnkişaf Partiyası 2001-ci ildə qurulub. Yarandığı vaxtdan qatıldığı 2002-ci, 2007-ci, 2011-ci, 2015-ci və 2018-ci il parlament seçkilərinin qalibi və təkbaşına iqtidar partiyası olub. -05D-