Türkiyə Qarabağ məsələsində Azərbaycana dəstəyini davam etdirəcək

Bakı/24.03.21/Turan: Türkiyə prezidenti Rəcəb Tayyib Ərdoğan çərşənbə günü hakim Ədalət və İnkişaf Partiyasının rəhbərlik etdiyi manifesti açıqlayıb. Manifestdə 2023-cü ilə qədərki dövrdə Ədalət və İnkişaf Partiyasının siyasətinin əsas istiqamətləri əksini tapıb.  Dövlət başçısı Ankara İdman Kompleksində keçirilən hakim partiyanın 7-ci konqresinin iştirakçılarına müraciət edib.

O qeyd edib ki, artıq 200 ildir ki, Türkiyənin inkişafını məhdudlaşdırmağa çalışan dairələr istədiklərinə bir daha nail ola bilməyəcəklər. "Bugünkü Türkiyə əvvəlki Türkiyə deyil! 2023-cü ilə qədər olan dövrdə ölkənin inkişaf məqsədləri 21-ci əsrdə güclü və qüdrətli Türkiyənin formalaşması üçün başlanğıc nöqtəsi olacaq", - Ərdoğan deyib.

O, Ankaranın xarici siyasi prioritetləri arasında Qarabağ münaqişəsində Azərbaycana dəstəyi göstərib.

“Azərbaycan torpaqlarının 20 faizinin işğalı azərbaycanlılarla bərabər bizim də ürəyimizi dağlamışdı. Nizamlama missiyasını öz üzərinə götürən ATƏT-in Minsk Qrupu bu problemi həll etmədi. Ötən il sentyabrın 27-də Azərbaycan əks-hücuma keçdi və biz onun yanında olduq. Azərbaycan Silahlı Qüvvələrinin qəhrəmanlığı sayəsində 30 illik işğala son qoyuldu", - o deyib.

"Türkiyə 10 noyabr 2020-ci il tarixli razılaşmanın bəndlərinin reallaşması üçün səylərini əsirgəməyəcək.  Bu proses Türkiyə-Azərbaycan qardaşlığını daha da möhkəmləndirəcək”, - Ərdoğan vurğulayıb.-16D-