Türkiyənin baş naziri Azərbaycana gəlib (YENİLƏNİB)

Türkiyənin baş naziri Ahmet Davutoğlu dekabrın 3-də Azərbaycana rəsmi səfərə gəlib.

Ahmet Davutoğlu və xanımı Sare Davutoğlunu hava limanında Azərbaycan baş nazirinin müavini Əli Əhmədov qarşılayıb.

Baş naziri Türkiyə Milli Kəşfiyyat Təşkilatının rəhbəri Hakan Fidan, Xarici İşlər Nazirliyinin Aparat rəhbəri Firudin Sinirlioğlu, baş nazirin müavinləri Mehmet Şimşek, Yalçın Akdoğan, qida, heyvandarlıq və kənd təsərrüfatı naziri Faruk Çelik, enerji və təbii qaynaqlar naziri Berat Albayrak, mədəniyyət və turizm naziri Mahir Ünal, nəqliyyat, dənizçilik və xəbərləşmə naziri Binəli Yıldırım müşayiət edir.

Ahmet Davutoğlu Azərbaycan prezidenti İlham Əliyev, baş nazir Artur Rasizadə ilə görüşəcək, ADA Universitetində mühazirə oxuyacaq.

Ahmet Davutoğlu Azərbaycana səfəri ərəfəsində deyib ki, Türkiyə ilə Azərbaycan Avropa və Asiyanı birləşdirir.

Onun firkincə, Azərbaycan və Türkiyə birgə olduqca vacib enerji layihələrini reallaşdırır.

“Belə layihələrdən biri TAP-dır. Energetika sahəsində Türkiyənin Azərbaycanla əlaqələri hər gün inkişaf edir”.

Onun sözlərinə görə, Türkiyə bundan sonra da Azərbaycanla münasibətləri inkişaf etdirəcək. “Bu Rusiya ilə münasibətlərdə yaranmış böhranla bağlı deyil”, deyə Davutoğlu qeyd edib.

Baş nazir bəyan edib ki, Türkiyə əvvəllər olduğu kimi Azərbaycanı dəstəkləməkdə davam edəcək.

“Çünki iki qardaş ölkəni ümumi mədəniyyət və ümumi tarix birləşdirir. Azərbaycanın işğal edilmiş ərazilərinin azad edilməsi bizim üçün vacib məsələlərdən biridir”, deyə o bildirib.

Səfər dekabrın 4-dək davam edəcək. -03D-

2015 Dekabr 03 (Cümə axşamı) 14:09:03

Türkiyənin baş naziri Əhməd Davudoğlu dekabrın 3-4-də Azərbaycanda olacaq. Bu barədə Türkiyənin “Anadolu” agentliyi məlumat yayıb.

Səfər çərçivəsində Ə.Davudoğlu prezident İlham Əliyevlə təkbətək və nümayəndə heyətinin iştirakı ilə görüşlər keçirəcək.

Bundan əlavə, baş nazir Artur Rəsizadə ilə görüş olacaq.

Görüşlərin və danışıqların mövzusu regional problemlər, ikitərəfli münasibətlər, Qarabağ münaqişəsi olacaq.

Çoxsaylı ekspertlər proqnozlaşdırırlar ki, Bakı görüşünün əsas mövzusu Türkiyə-Rusiya münasibətlərinin kəskinləşməsi və bu əlaqələrin yaxşılaşdırılması yolları olacaq. Məlum  olduğu kimi, Türkiyənin hava məkanını pozan Rusiyaya mıxsus  Cy-24 bombardmançı təyyarəsinin vurulması nəticəsində münasibətlər pozulduqdan sonra rəsmi Bakı bu əlaqələrin normallaşması üçün öz vasitəçiliyini təklif edib.

Bundan əlavə, çox güman ki, tərəflər Türkiyədən Mərkəzi Asiyaya nəqliyyat yollalrının Azərbaycana yönləndirilməsi məsələsinə da baxacaqlar.-02D-