Ukrayna: 1 mart saat 12:00-a olan məlumat

Kiyev/01.03.22/Turan:  Ukrayna Baş Qərargahının məlumatına görə, Rusiya ordusu  Ukraynanın Suma, Lebedin və Axtırka şəhərlərini mühasirədə saxlamaqda davam edir. Rusiya ordusu Kiyev istiqamətində hücumları davam etdirmək üçün yenidən qruplaşır.

Donetsk vilayətində Rusiya qoşunları 1, 2-ci  ordu korpusunun və 8-ci ordu bölmələrinin, artilleriyanın dəstəyilə Ukraynanın Mariupol şəhərini ələ keçirməyə cəhd göstəriblər. Nəticə yoxdur. Donetsk və Luqansk vilayətlərinin inzibati sərhədlərinə çıxış məqsədinə nail olmayıblar.

Rusiya ordusu Tavrik istiqamətində Skadov, Qolaya Pristan, Xerson, Novaya Kaxovka yaşayış məntəqələri ərazisində sərhədə çıxıb. Yenidən qruplaşdırıldıqdan sonra Nikolayev istiqamətində hücum davam edir.

Xarkov və Çerniqov rayon mərkəzlərini ələ keçirə bilməyən ordu həmin şəhərlərin yaşayış məntəqələrini raket atəşinə tutub.

Hücum fürsətlərini əldən verən düşmən Kiyev şəhərini mühasirəyə almağa yönəlib. Bu barədə Turan agentliyinə könüllü həkim Ruslan Ağayev məlumat verib.

Rusiya Müdafiə Nazirliyi bildirib ki, müdafiə naziri Sergey Şoyqu Silahlı Qüvvələrin rəhbərliyilə keçirdiyi selektor müşavirəsində bildirib ki, Rusiya Federasiyası Silahlı Qüvvələri qarşıya qoyulan məqsədlərə nail olana qədər Ukraynada xüsusi hərbi əməliyyatı davam etdirəcək. Əsas vəzifə Rusiyanı Qərb ölkələri tərəfdən xarici hərbi təhlükədən qorumaqdır.

O xatırladıb ki, ali baş komandanın qərarına əsasən fevralın 24-dən Rusiya Silahlı Qüvvələri Donbas əhalisinin müdafiəsi, Ukraynanın demilitarizasiyası və denasifikasiyası məqsədilə xüsusi hərbi əməliyyat aparır.—0—