Ukrayna deputatları Aİ ölkələrini və ABŞ-ı Yanukoviçə qarşı sanksiyalar tətbiq etməyə çağırıblar

Ukraynanın bəzi vilayətlərində ölkədəki vəziyyətlə əlaqədar vilayət şuralarının növbədənkənar sessiyaları keçiriləcək. İclaslarda müzakirə olunacaq əsas məsələ “Ukraynada ictimai-siyasi vəziyyət haqqında” olacaq. Xarkov, Luqansk, Donetsk, Odessa, Vinnitsa, Çerkass, Poltava, Kiyev, Nikolayev, Dnepropetrovsk və Kirovoqrad vilayət şuraları sessiyalar keçirəcək. Bu barədə Rosbalt xəbər yayıb.

Bundan başqa, Simferopolda Krım Ali Radası “növbədənkənar” iclas keçirəcək, deyə “Ukraynskaya pravda” məlumat yayıb.

“Dövlət hakimiyyətinin rüsvayçı hərəkətləri sağlam məntiqin bütün sərhədlərini aşıb. Dövlət hakimiyyətinin silahlı nümayəndələrinin Ukraynada, Avropanın mərkəzində insanların dinc toplantılarını qanlı şəkildə dağıtmasını artıq insan hüquqlarının pozulması kimi deyil, həm də cinayət kimi qiymətləndirmək lazımdır”, deyə İvan-Frankovski vilayət şurasının bəyanatında bildirilir.

Bundan başqa, deputatlar Avropa İttifaqı ölkələrini və ABŞ-ı Ukrayna prezidenti Viktor Yanukoviçə və hökumət üzvlərinə qarşı sanksiyalar tətbiq etməyə çağırıblar.

Lvov vilayətində isə dekabrın 2-də ümumxalq tətili elan edilib, deyə Lvov vilayət şurasının rəhbəri Petr Kolodiy bildirib. Xəbəri “İnterfaks-Ukrayna” yayıb.

Bu arada, ölkə hakimiyyəti Ukraynada fövqəladə vəziyyət rejimi elan edilib. Bu gün Kiyevin mərkəzində Ukrayna hakimiyyətinə qarşı çoxminlik mitinqlər davam edir. Prezident administrasiyasının binası qarşısında daha faciəvi hadisələr baş verib, nümayişçilər hücumla binanı ələ keçirməyə çalışıblar, lakin daxili qoşunlar tərəfindən sıxışdırılaraq uzaqlaşdırılıblar. -02D-