Ukrayna hakimiyyəti müxalifətin Kiyevin mərkəzindəki mitinqini dağıtmağa hazırlaşır

Güc qurumları Meydanı boşaltmağa hazırlaşırlar, bu barədə bazar ertəsi Kiyevdə keçirilən mətbuat konfransında müxalifət liderlərindən biri Arseni Yatsenyuk bildirib. “Mərkəzdə bütün metro stansiyaları bağlanıb, daxili qoşunların və “Berkut”un birləşmələri buraya gəlirlər, deyə o əlavə edib. “İndi biz Meydanımızı qoruyacağıq”, deyə Yatsenyuk Bakı vaxtı ilə saat 16.00-da bildirib.

UDAR müxalifət partiyasının lideri Vitali Kliçko Müstəqillik Meydanında toplaşanlara müraciət edərək, qadınlardan və uşaqlardan nümayiş yerini tərk etməyi xahiş edib. Kliçko bildirib ki, Bessarabski və Mixaylovski meydanlar tərəfindən xüsusi təyinatlı dəstələr yaxınlaşır.

Bir müddət əvvəl Kiyevin mərkəzinə xüsusi təyinatlılarla dolu avtobus və yük maşınlarının gəldiyi bildirilib. Müxalifət prezident administrasiyası, hökumət və parlament binalarına girişləri mühasirəyə almaqda davam edir. “Unian” agentliyinin məlumatına görə, küçələrdə nümayişçilər hərbi qulluqçularla dolu maşınların ətrafında toplaşaraq, onları Meydana hücuma keçməməyə çağırırlar.

Bazar ertəsi səhər Ukraynanın başqa bölgələrindən Kiyev yaxınlığındakı Vasilkov şəhərindəki hərbi hissədə yerləşdirilmiş xüsusi təyinatlı “Tiqr” və “Bars” dəstələrinin döyüşçüləri müxalifətin mühasirəsini dağıdaraq, paytaxt istiqamətinə hərəkət ediblər. Ukrayna KİV-lərinin yaydığı məlumata görə, hərbi hissə önündə mitinq edən fəallar “Berkut” dəstəsinin əməkdaşları tərəfindən mühasirəyə alınıb, bu da 20 xüsusi təyinatlı milis avtobusunun bir neçə zirehli avtomobilin dəstəyi ilə hərbi hissə ərazisini tərk etməyə imkan verib. Kiyev vilayət milisinin mətbuat xidməti də bu məlumatlar təsdiq edərək, “şəxsi heyətin dəyişdirilməsi üçün” Vasilkovdan bir dəstə Kiyev istiqamətinə yola düşüb. -02D-