Ukraynanın işğal edilmiş ərazilərində "filtrasiya düşərgələri" yaradılıb

Vaşinqton/29.04.22/Turan: Rusiyanın Ukraynaya hücumu davam etdirmək və ölkənin demokratik yolla seçilmiş hökumətinin zorla təslim edilməsinə, bütün Ukraynada yerli hakimiyyət orqanlarının buraxılmasına nail olmaq olmaq planları ABŞ-a məlumdur. Bu barədə Amerikanın yüksək vəzifəli diplomatı cümə axşamı keçirdiyi onlayn-brifinqdə jurnalistlərə bildirib.

"Ukraynanın yeni hökumətinin və yeni konstitusiyasının tərkibi Rusiya məmurları və "separatçılar" tərəfindən hazırlanır. Plana əsasən, Ukraynanın legitim liderlərinin və Ukraynanın qanuni hakimiyyətini dəstəkləyənlərin istənilən rəhbər vəzifələri tutması qadağan ediləcək", deyə ABŞ-ın ATƏT-dəki səfiri Maykl Karpenter bildirib, xəbəri Turan-ın Vaşinqton müxbiri verib.

Kreml Ukraynanın cənubunda və şərqində - fevralın 24-dən sonra qanunsuz olaraq ələ keçirdiyi bölgələrdə saxta referendumlar keçirməyə hazırlaşır. Çərşənbə axşamı Rusiya qüvvələri Xerson vilayətini "azad etdiklərini" və indi yerli valyuta kimi rus rublundan istifadə etməyə hazırlaşdıqlarını bəyan ediblər.

"Biz Rusiyanın Ukraynanın cənubunda və şərqində onun nəzarəti altında olan bölgələrdən əhalinin "filtrasiya düşərgələri" vasitəsilə zorla Rusiyaya köçürülməsini fəallaşdırmaq niyyətinə hazır olmalıyıq.   

Bizdə Rusiya qüvvələrinin yerli mülki əhalini həbs etdiyi, onları bu düşərgələrdə saxladığı, daha sonra Ukrayna hökuməti və ya müstəqil KİV-lərlə əlaqələrinin olub-olmaması barədə amansızlıqla dindirdiyi barədə məlumatlar var", deyə o bildirib.

Hər hansı belə əlaqədə şübhəli bilinənləri "Donetsk xalq respublikasına" göndərməzdən əvvəl döyürlər və işgəncə verirlər, orada isə onların çoxu yoxa çıxır. Bu filtrasiya düşərgələrində bir çox mülki şəxslər "dindirilir", daha sonra Rusiya və ya Donbasa köçürülür.

Bu əməllər davam edərsə, Rusiya ATƏT-dən kənarlaşdırıla bilərmi? Turan-ın bu sualına cavabda Karpenter belə deyib: "ATƏT bizim dialoq apardığımız forum, sahə missiyaları, DTİHB, Seçkiləri Müşahidə İdarəsi və Demokratik İnstitutlar və İnsan Hüquqları İdarəsi kimi müstəqil instituları olan təşkilatdır. Biz Rusiya və Belarusiyanın diplomatik cəhətdən təcrid edilməsi üçün addımlar atırıq", deyə o bildirib. -25В-