USCIRF: Azərbaycan hökuməti vicdan məhbuslarını azad etməlidir

ABŞ beynəlxalq din azadlığı üzrə ali komissiyası  (USCIRF)  Azərbaycanda din azadlığı və insan hüquqlarının pozulmasını pisləyib. Turan-ın Vaşinqton müxbiri bildirib.

ABŞ Konqresinin dünyada dini azadlıqlara nəzarət məqsədilə yaratdığı komissiyanın bəyanatında deyilir: “Bu pozuntular hüquq müdafiəçiləri, dini  qrupların üzvləri və vətəndaş cəmiyyəti fəallarına qarşı həbslər, saxlanmalar və qarşı sərt hökmlərdə özünü göstərir”.

  USCIRF missiyası bu yaxınlarda Azərbaycanda olub. Məqsəd bu həbslərlə bağlı narahatlığı diqqətə çatdırmaq olub.

  “Azərbaycan hökuməti görkəmli vicdan məhbuslarını, “Azadlıq” radiosunun jurnalisti Xədicə İsmayılovanı, hüquq müdafiəçiləri Leyla və Arif Yunusları həbsdə saxlamaqda davam edir.

Dini azadlığı, insan haqlarını dəstəkləyən bu cəsarətli fəallar mükafatlandırılmalıydı, saxta ittihamlarla həbsdə oturmamalıydı.

“Bu, ancaq aysberqin görünən  tərəfidir. Belə ki, Azərbaycan  türmələrində 100-dən çox məhbus əziyyət  çəkir”, - USCIRF rəhbəri Robert Corc bildirib.

X.İsmayılovanı saxta ittihamlarla 9 il həbs cəzası gözləyir. O, din azadlığını pozulmasına və korrupsiyaya qarşı fəal mübariz kimi tanınır.

8,5 və 7 il müddətinə azadlıqdan məhrum edilmiş Yunuslar cütlüyünə qarşı vergidən yayınma və sui-istifadə kimi saxta ittihamlar irəli sürülüb.

Digər hüquq müdafiəçisi Rəsul Cəfərov da saxta ittihamlar ilə mühakimə olunub.

İyulun əvvəlində Bakıda rəsmi şəxslərlə görüş zamanı USCIRF nümayəndə heyəti Yunuslar cütlüyünün həbsi də daxil olmaqla, ölkədə dini azadlıqların pozulması ilə bağlı narahatlığını bildirib.

Missiya Azərbaycanda kitabları qadağan olunan türk ilahiyyatçı Səid Nursinin ardıcılları Zəkəriyə İsak Məmmədov və Şahin Hacıyevin məsələsini qaldırıb.

Həmçinin dini mətnlərin yayılmasına görə həbsdə olan Yeqovo Şahidləri tərəfdarları Validə Cəbrayılova və İrina Zaxarçenkonun məsələsi qaldırılıb.

“Bu hərəkətlər yəhudi, katolik və pravoslav da daxil olmaqla, başqa dini qrupların hökumət tərəfindən dəstəklənməsi ilə ziddiyyət təşkil edir”, - bəyanatda deyilir.

“Azərbaycan hökuməti bu və digər vicdan məhbuslarını azad etməlidir. İlahiyyatçı Taleh Bağırovun  gec də olsa həbsdən azad edilməsi düzgün istiqamətdə atılmış addımdır. Lakin hökumət dini azadlıqlar və insan hüquqları sahəsində öz öhdəliklərini yerinə yetirmək üçün daha çox iş görməlidir.

Azərbaycandakı güclü dini dözümlülük ənənəsinin praktikada da

öz əksini tapması çox vacibdir”, - o bildirib.

* USCIRF Azərbaycanı dini etiqad azadlığının pozulduğu ikinci kateqoriya ölkələrə aid edib. Bu, özünü  onda göstərir ki, demək olar ki, bütün protestant qrupları hüquqi statusdan məhrumdur: qeydiyyata alınmamış dini qrupların üzvləri təqiblərə məruz qalır və onlar üçün dini ədəbiyyatın nəşri, idxal və ixracı, yayımı üçün icazə tələb olunur. Vaizlər isə yalnız Azərbaycanda dini təhsil almış şəxslər ola bilər.-25D-