Üzeyir Cəfərov: «Söhbət Azərbaycanda Türkiyə hərbi bazasının yaradılmasından getmir»

Zeynalabdin Tağıyev qəsəbəsindəki aerodromun terminallarından birinin və Bakıdakı “Qızıl Şərq” şəhərciyində bina və tikilinin türk hərbçilərinin istfadəsinə verilməsi barədə hökumətlərarası protokolla artıq praktikada  mövcud olan bir şey sənədləşdirilir. Bunu hərbi ekspert Üzeyir Cəfərov Turan-ın müxbiri ilə söhbətində bildirib.

Əslində türk hərbçilər birgə təlimlərdə iştirak edən hərbi təyyarələrin yerləşməsi və təchizatı üçün Zeynalabdin Tağıyev qəsəbəsindəki aerodromun terminalından istifadə ediblər. “Qızıl Şərq” şəhərciyindəki yaşayış binalarından birində isə türk hərbçiləri – təlimlərdə iştirak edəm təlimatçıar, zabitlər yaşayıblar. Orada yaxınlıqda yardımçı tikililər var.  Hazırda bu obyektlər diplomatik statusla möhkəmləndirilir. Çox güman ki, Türkiyədə müntəzəm təlimlərdə iştirak edən azərbaycanlı hərbçilər də analoji obyektlər əldə edəcəklər.

O qeyd edib ki, sözügedən obyektlərin türk hərbçilərə verilməsi Türkiyə hərbi bazasının yaradılması demək deyil.

Birincisi, Azərbaycanda Türkiyə hərbi bazasının yaradılması üçün ölkənin hərbi doktrinasına dəyişiklik etmək lazımdır. Belə ki, sənəd xarici hərbi bazaların yerləşdirilməsini istisna edir. İkincisi, hərbi baza xarici dövlətin hərbçilərinin avtonom idarəçiliyində olan tamamilə qapalı ərazidir.

İndiki halda söhbət  Zeynalabdin Tağıyev qəsəbəsindəki aerodromun bir hissəsinin istifadəsindən gedir.

“Qızıl Şərq” şəhərciyi isə mülki əhalinin də yaşadığı açıq ərazidir. –06D--