Vəkil məhkəmədən Rail Abbasova bəraət verilməsini istəyir

Dekabrın 26-da Bakı Ağır Cinayətlər Məhkəməsində fəal Rail Abbasovun işi üzrə prosesində vəkil Elçin Sadıqov son sözlə çıxış edib.

O, məhkəmə istintaqının məhkəmənin çəkişməliliyi prinsipi pozulmaqla aparıldığını, müdafiə tərəfin vəsatətlərinin təmin edilmədiyini, Abbasovun təqsirinin sübutlarının təqdim edilmədiyini bildirib.

Belə ki, Abbasovun zərərçəkmişdən guya ona üçüncü şəxsin mənzilini satmaq vədi müqabilində 200 min manat almasını sübut edən faktlar yoxdur.

Vəkil həmçinin qeyd edib ki, istintaqın pulun Abbasova şokolad qutusunda verildiyi haqqında iddiaları doğru deyil. Sadıqov qeyd edib ki, şokolad qutuları və onların içində olduğu paket qalıb. Bu, istintaqın təqdim etdiyi videoda əksini tapıb və müdafiə tərəfi həmin paketi və Abbasovun istifadə etmədiyi şokolad qutularını təqdim edə bilər.

Vəkil qeyd edib ki, Abbasova qarşı iş onun digər fəalın - Bəxtiyar Hacıyevin müdafiəsində fəal iştirakı ilə əlaqədar saxtalaşdırılıb.

Müdafiə tərəfi həmçinin məhkəmədən Abbasova qarşı 200 min manat ölçüsündə zərəri qarşılamaq tələbini ləğv etməyi xahiş edib, belə ki, ona qarşı mülki iddia belə yoxdur.

Abbasov özü çıxışa hazır olmayıb və hazırlıq üçün vaxt istəyib. Məhkəmə prosesi yanvarın 9-da davam etdiriləcək.

* Xatırladaq ki, 20 sentyabr 2023-cü il tarixində Bakının Nəsimi Rayon Məhkəməsi Abbasovu CM-in 178.3.2-ci (dələduzluq, külli miqdarda ziyan vurmaqla törədildikdə) maddəsi ilə irəli sürülən ittihamla 4 ay müddətinə həbs edib. Sonradan həbs müddəti uzadılıb.

Abbasov ittihamı rədd edir, əsl səbəbin 2022-ci ilin dekabrında həbs olunmuş fəal Bəxtiyar Hacıyevin hüquqlarının müdafiəsində fəal iştirakı olduğunu hesab edir.

Hüquq müdafiəçiləri hər iki şəxsi siyasi məhbus kimi tanıyıblar.