Venesiya Komissiyasını Azərbaycanın diffamasiya haqqında qanun layihəsini yararsız hesab etdi

Oktyabrın 11-də Strasburqda Avropa Şurası Venesiya Komissiyasının ekspertləri Azərbaycan hakimiyyətinin təqdim etdiyi diffamasiya haqqında qanun layihəsi ilə bağlı rəy veriblər.

VK-nin Turan agentliyinə göndərilmiş press-relizində qeyd edilir ki, “qanun layihəsi Avropa İnsan Hüquqları Məhkəməsinin prinsiplərinə, presendent hüquqa uyğun deyil və ölkənin bu sahədəki öhdəliklərinin adekvat tətbiqinə imkan vermir”.

Bundan başqa, qanun layihəsi “yerli qanunvericilikdən tamamilə təcrid olunmuş şəkildə hazırlanıb və diffamasiyaya görə cinayət məsuliyyətinin ləğvini nəzərdə tutmur”.

“Venesiya Komissiyası təəssüflə qeyd edir ki, onun əvvəlki tövsiyələrinin tətbiqi və qanunvericiliyin adekvat hala salınması üçün heç bir addım atılmayıb”.

Venesiya Komissiyası “diffamasiyanın indiyədək ciddi cinayət sanksiyaları, o cümlədən həbslə assosiasiya edilməsinə təəssüf edir. Bundan başqa, bu sanksiyalar İnternetdəki ifadələrə də şamil edilib”, deyə bəyanatda bildirilir.

Xatırladaq ki, sözügedən qanun layihəsi Azərbaycan Prezident Administrasiyasında hazırlanıb və mayda Venesiya Komissiyasına göndərilib.

Həmin vaxt administrasiyanın ictimai-siyasi şöbəsinin müdiri Əli Həsənov sənədin “proqressiv” xarakterli olduğunu bəyan edib.

“Kimsə hesab edirsə ki, təhqir edəcək və buna görə məsuliyyət daşımayacaq, yanılır. Cinayət məsuliyyəti qalacaq. Qanun etikaya riayət edən media üçün daha geniş imkanlar yaradacaq, medianın azadlıq dairəsini genişləndirəcək”, deyə Həsənov bildirib.

O, İnternetdə təhqir və böhtanın yolverilməz olduğunu bildirib. “Cəmiyyətdə özbaşınalıq yaradan normalar qəbul etməyəcəyik. İnternet istədiyi yerə girən nəzarətsiz pişik kimidir. İnternetdə təhqirlərdən hamı narazıdır”, deyə Həsənov bildirib. -02В-