Vergi əməkdaşları Turan-da axtarış zamanı sənədləri və elektron daşıyıcıları müsadirə ediblər (YENİLƏNİB-VİDEO-2)

Bakı/16.08.17/Turan: Saat 14.00 radələrində Vergilər Nazirliyinin Vergi Cinayətlərinin İbtidai Araşdırılması Departamentinin nümayəndələri Turan İnformasiya Agentliyində axtarışı yekunlaşdırıblar və agentliyin ofisini tərk ediblər.

Vergi əməkdaşları 2014-cü ildən etibarən agentliyin maliyyə sənədlərinin, kargüzarlıqla və onlara "maraqlı" gələn jurnalistlərin şəxsi işləri ilə bağlı bir sıra digər sənədlərin surətlərini götürüblər.

Agentliyin mühasibinin şəxsi noutbuku da götürülüb.

Bu zaman əməkdaşların şəxsi əşyalarına və bəzi kompütelərin yaddaşına baxış keçirilib. Amma istintaq orqanları jurnalistlərin işi ilə bağlı məlumatla maraqlanmayıblar.

Maraqlıdır ki, agentlik nümayəndələri vergi əməkdaşlarına sənədlərin surətlərini avqustun 17-də təqdim edəcəklərini söyləməsinə baxmayaraq, axtarış aparılıb.

Digər tərəfdən, agentliyə avqustun 8-də cinayət təqibi başlanması haqqında rəsmi məlumat verilib və sənədlərin təqdim edilməsi üçün 15 gün vaxt ayrılıb.

Turan Agentliyi bir daha bildirir ki, vergi ödənişindən yayınma haqqında bütün iradları rədd edir, cinayət işini qərəzli, sifarişli, jurnalistlərin peşə fəaliyyətinə qarşı yönəlmiş addım kimi qiymətləndirir.

Agentlik cinayət işinin əsassız olduğu barədə şikayətlə 1 saylı Bakı İnzibati-İqtisad Məhkəməsinə müraciət edib. Amma məhkəmə hələlik hazırlıq iclasının tarixini müəyyən etməyib. -06B-

* * *

2017 Avqust 16 (Çərşənbə) 14:35:05

Vergi nümayəndələri Turan-ın maliyyə sənədlərini götürür (YENİLƏNİB-VİDEO)

Saat 13:30-a olan məlumata görə, Turan-da axtarış davam edib. Vergilər Nazirliyinin nümayəndələri maliyyə sənədlərini götürürlər.

Digər KİV-lərin jurnalistləri içəriyə buraxılmır.

Axtarış və götürmə Nəsimi Rayon Məhkəməsinin qərarı ilə keçirilir.-0-

* * *

2017 Avqust 16 (Çərşənbə) 13:33:59

Vergi nümayəndələri Turan-ın sənədlərini götürür

Bakı/16.08.17/Turan: Çərşənbə günü səhər Vergilər Nazirliyinin Vergi Cinayətlərinin İbtidai Araşdırılması Departamentininin əməkdaşları Turan agentliyində yoxlamaya başlayıblar. Onlar sənədləri götürür, əməkdaşların şəxsi əşyalarını yoxlayırlar. Yoxlama və sənədlərin götürülməsi prosesini çəkməyə icazə verməyiblər.

Vergi nümayəndələri yoxlama və götürmə barədə sanksiyaya dair sənədin surətini verməyiblər, ancaq tanış olmaq üçün göstəriblər.

Yoxlama davam edir.

Turan-a qarşı cinayət işi avqustun 7-də başlayıb.

Vergi nümayəndələri 2014-2016-cı illərdə 37 min manat məbləğində vergidən yayınmanın olduğunu bildirir.

Agentlik bunu qəti şəkildə inkar edir, cinayət işini qanunsuz və sifarişli hesab edir. Turan Vergi Cinayətlərinin İbtidai Araşdırılması Departamentini və cinayət işinə təşəbbüs göstərən Lokal Gəlirlər Departamentini məhkəməyə verib. -06D--