Vətəndaş cəmiyyətinin fəalları Avropa İnsan Hüquqları Məhkəməsinə müraciət ediblər

Azərbaycan vətəndaş cəmiyyətinin fəalları Avropa İnsan Hüquqları Məhkəməsinə müraciət ediblər. Onlar siyasi motivlərlə həbs edilmiş Elnur Seyidovun həbsi ilə bağlı qərarın dəyişdirilməsinə dair  şikayətə təcili baxılmasını xahiş ediblər.  

Azərbaycanda fəaliyyət göstərən vətəndaş cəmiyyəti təmsilçiləri hazırda həbsdə olan "Texnikabank”ın Yasamal filialının keçmiş müdir müavini, Azərbaycan Xalq Cəbhəsi Partiyasının sədrinin qohumu Elnur Seyidovun şikayətinə Avropa İnsan Haqları Məhkəməsində tezliklə baxılması ilə bağlı bu qurumun prezidenti Nikolas Bratzaya müraciət ediblər. Müraciətdə E.Seydovun səhhətindəki problemlər qeyd olunaraq, onun işinə məhkəmənin daxili tədbirlər reqlamentinin 39-cu maddəsinə uyğun olaraq baxılması xahiş olunub. Qeyd edək ki, E.Seyidov dağınıq skleroz  xəstəliyindən əziyyət çəkir

Müraciət müəllifləri E.Seyidovun həyatının qorunması məqsədi ilə onun barəsində həbsqətimkan tədbirinin seçilməsi haqda çıxarılan qərarın dəyişdirilməsini və azad olunmasını, o cümlədən bununla bağlı Avropa İnsan Haqları Məhkəməsinə göndərilən şikayətə tez baxılmasını xahiş ediblər.

Müraciəti Hüquq Maarifçiliyi Cəmiyyətinin sədri İntiqam Əliyev,  Media Hüququ İnstitutunun direktoru Rəşid Hacılı, Sülh və Demokratiya situtunun direktoru Leyla Yunus, Azərbaycan Hüquqçular Assosiasiyasının prezidenti Ənnağı Hacıbəyli,  İnsan Hüquqları üzrə Maarifləndirmə İctimai Birliyinin sədri İradə Cavadova, Helsinki Vətəndaş Assambleyasının Azərbaycan nümayəndəliyinin rəhbəri Arzu Abdullayeva, Dilarə Əliyeva adına Qadın Hüquqlarının Müdafiə Cəmiyyətinin sədri Novella Cəfəroğlu, Reportyorların Azadlıq və Təhlükəsizlik İnstitutunun direktoru Emin Hüseynli, “Demokratiyanı öyrənmə” İctimai Birliyinin sədri Mirəli Hüseynov, Seçkilərin Monitorinqi və Demokratiyanın Tədrisi Mərkəzinin rəhbəri Anar Məmmədli,  “Hüquq və İnkişaf” İctimai Birliyinin rəhbəri Hafiz Həsənov, Milli və Beynəlxalq Araşdırmalar Mərkəzinin rəhbəri Leyla Əliyeva, Siyasi Azadlıqları Müdafiə Alyansının koordinatoru Samir Kazımlı və  “İnsan Hüquqları” Klubunun rəhbəri Rəsul Cəfərov imzalayıblar. 

  Müraciət müəllifləri adından Siyasi Azadlıqları Müdafiə Alyansının koordinatoru Samir Kazımlı bildirib ki, bu yaxınlarda (iyulun 12-də) Azərbaycan İslam Partiyasının sədr müavini Vaqif Abdullayev həbsxanada uzun sürən ağır xəstəlikdən vəfat etdi və bu hadisə göstərib ki, hökumət ağır xəstəliklərdən əziyyət çəkən dustaqlara, o cümlədən siyasi motivlərlə həbs edilmiş şəxslərə qarşı humanist davranmır. “Hazırda vicdan məhbusları Vidadi İsgəndərov şəkərli diabet, Şahin Həsənli ürək və bel ağrılarından, Azərbaycan Milli Dövlətçilik Partiyasının sədri Nemət Pənahlı şəkərli diabet və böyrək ağırlarından, hüquq müdafiəçisi, "Tolışi Sədo" qəzetinin baş redaktoru Hilal Məmmədov isə astma xəstəliyinin ağır formasından əziyyət çəkirlər. Biz bu şəxslərə qarşı humanist davranışı gözləyirik”. 

  S.Kazımlı yaxın günlərdə bu şəxslərlə bağlı Qırmız Xaç Cəmiyyətinə və Azərbaycan prezidentinə də müraciət olunacağını bildirib. -02D-