Vladimir Putin Mehriban Əliyevaya Dostluq Ordeni təqdim edib

Bakı/22.11.19/Turan: Rusiya Federasiyasının prezidenti Vladimir Putin bu gün Novo-Oqaryovada Rusiyada rəsmi səfərdə olan Azərbaycan Respublikasının Birinci vitse-prezidenti Mehriban Əliyevanı qəbul edib. Görüşdə Rusiya dövlət başçısı Rusiya-Azərbaycan münasibətlərinin inkişafında və möhkəmləndirilməsində xidmətlərinə görə Mehriban Əliyevaya Rusiya Federasiyasının dövlət mükafatını - Dostluq ordenini təqdim edib, xəbəri RF prezidentinin mətbuat xidməti yayıb.

Putin cari ilin ilk 9 ayı ərzində 26 faiz artan ticari-iqtisadi münasibətlərin həcmindən məmnunluğunu ifadə edib. "Demək olar ki, bütün  istiqamətlər üzrə - parlamentlər, ictimai təşkilatlar səviyyəsində əlaqə saxlayırıq. Azərbaycan Prezidenti ilə mənim çox etimada əsaslanan mehriban münasibətlərim formalaşıb", deyə Putin bildirib.

O, həmçinin qeyd edib ki, noyabrın 23-də Əliyeva və RF Federasiya Şurasının sədri Valentina Matvienko X Regionlararası Forumu açıb. "Hesab edirəm ki, bu, bizim əməkdaşlığımızın olduqca mühüm istiqamətidir. Ona görə ki, bizim qarşılıqlı fəaliyyətimizin xeyli hissəsi məhz regionlar səviyyəsində həyata keçirilir", deyə Putin qeyd edib.

Əliyeva öz növbəsində "Rusiyaya rəsmi səfərə dəvət edildiyinə görə dərin minnətdarlığını" bildirib. "Yenidən Moskvada olmağıma çox şadam. Moskva mənim üçün yaxın, doğma şəhərdir. Mənim tələbəlik illərim burada keçib. Moskva hər dəfə göz oxşayır", deyə birinci vitse-prezident bildirib.
O, həmçinin Rusiya Federasiyasının dövlət mükafatı - Dostluq Ordeni ilə təltif edildiyinə görə təşəkkür edib. Əliyeva Azərbaycan Respublikası prezidentinin salamını və ən xoş arzularını çatdırıb.

"Rusiya Federasiyası ilə münasibətlər Azərbaycanın xarici siyasətində çox mühüm yer tutur. Siz dediyiniz kimi, bütün istiqamətlər üzrə müsbət dinamika müşahidə edirik. Dövlətlər səviyyəsində müntəzəm siyasi dialoq mövcuddur. Azərbaycan və Rusiya beynəlxalq arenada bir-birini dəstəkləyir", deyə Əliyeva qeyd edib.

O, həmçinin Rusiyadan turist axınının durmadan artdığını qeyd edib. "Keçən il 900 min rusiyalı Azərbaycana səfər edib. Bu il biz həmin göstəricinin artacağını gözləyirik", deyə Əliyeva bildirib.

"Azərbaycanda rus mədəniyyətinə, rus dilinə çox böyük hörmət bəsləyirlər", deyə Əliyeva əlavə edib.

Bakıda M.V.Lomonosov adına Moskva Dövlət Universitetinin, İ.M.Seçenov adına Moskva Dövlət Birinci Tibb Universitetinin filialları çox uğurla fəaliyyət göstərir. Bu ildən etibarən Azərbaycan Diplomatik Akademiyasının və Moskva Dövlət Beynəlxalq Münasibətlər İnstitutunun ikili magistr diplomları proqramının birgə həyata keçirilməsinə başlanıb. Azərbaycanda 338 məktəbdə tədris rus dilində aparılır, 14 dövlət ali məktəbində rusdilli bölmə fəaliyyət göstərir. Rusiyada 11 min azərbaycanlı tələbə təhsil alır. "Və əlbəttə ki, Azərbaycanın çoxminlik rus icması ölkəmizin ümumi inkişafına öz layiqli töhfəsini verir", deyə Azərbaycanın birinci vitse-prezidenti qeyd edib.

Putin öz növbəsində Azərbaycanın "həqiqətən də, rus mədəniyyətinə, rus dilinə münasibətin ən yüksək səviyyədə saxlanıldığının hiss olunduğu keçmiş Sovet İttifaqı ölkələrindən biri olduğunu" təsdiq edib.

"Biz bunu çox yüksək qiymətləndiririk. Ona görə ki, bu baza bizim bütün başqa istiqamətlərdə münasibətləri, o cümlədən iqtisadi və humanitar əlaqələri, sözün geniş mənasında, inkişaf etdirməyə imkan verir. Buna görə biz Sizə çox təşəkkür edirik və öz tərəfimizdən bu trendi dəstəkləmək üçün nə lazımdırsa edəcəyik. Hesab edirəm ki, bu, bizim ümumi sərvətimizdir. Ona görə ki, bu, insanların öz aralarında hər hansı sədlər və maneələr olmadan ünsiyyət saxlamalarına, həm şəxsiyyətlərarası, həm də dövlət səviyyəsində münasibətləri inkişaf etdirməyə imkan verir", deyə Putin bildirib. -06В-