Xarici işlər naziri Aİ-nin xüsusi nümayəndəsinə 6 əsir barədə məlumat verib

Bakı/01.06.21/Turan: Azərbaycan Respublikasının xarici işlər naziri Ceyhun Bayramov Avropa İttifaqının Cənubi Qafqaz üzrə xüsusi nümayəndəsi Toivo Klaar ilə telefon danışığında erməni əsirləri barədə məlumat verib. Bu barədə Xarici İşlər Nazirliyi məlumat yayıb.

Nazir 6 əsirin Azərbaycan ərazisində yolların minalanmasına yönəlmiş təxribat törətdiklərini deyib.  Azərbaycan azad olunmuş ərazilərdə Ermənistan tərəfindən basdırılmış və insan həyatı üçün birbaşa təhlükə törədən çoxsaylı minaların təmizlənməsi ilə məşğul olduğu bir vaxtda Ermənistan tərəfinin bu kimi təxribatlara əl atmasının yolverilməz olduğu vurğulanıb.

Ceyhun Bayramov sərhəd məsələsi ilə bağlı gərginliyin aradan qaldırılmasının, bu xüsusda mövcud olan fikir ayrılıqlarının danışıqlar yolu ilə həllinin vacibliyini qeyd edib, Azərbaycan Respublikasının sərhədin delimitasiyası və demarkasiyası üzrə müvafiq üçtərəfli komissiyanın yaradılması təklifini dəstəklədiyini qarşı tərəfin diqqətinə çatdırıb.

Telefon danışıgı 31 may 2021-ci il tarixində, axşam vaxtı, Toivo Klaarın təşəbbüsü ilə baş tutub.

Tərəflər bölgədə mövcud olan cari vəziyyət, üçtərəfli bəyanatların icrası, habelə sərhəddə baş verən son gərginliklə bağlı fikir mübadiləsi aparıblar, deyə məlumatda bildirilir.-0-