Xarici işlər nazirləri Gəncədə toplanır

Türkiyənin “Anadolu” xəbər agentliyi Azərbaycan, Gürcüstan və Türkiyə xarici işlər nazirlərinin çərşənbə günü Gəncədə keçiriləcək görüşü barədə məlumat yayıb. 

Türkiyə Xarici İşlər Nazirliyinin yaydığı açıqlamaya istinadən mənbə bu görüşün sayca üçüncü olduğunu bildirir və “Türkiyə-Azərbaycan-Gürcüstan Xarici İşlər nazirlərnin “üçlü toplantısı”nın fevralın 19-da Ə.Davudoğlunun da iştirakı ilə Azərbaycanda keçiriləcəyini nəzərə çatdırır. 

Bu nazirlərin ilk görüşünün 2012-ci il iyunun 8-də Trabzonda, ikincisinin, 2013-cü il martın 28-də Batumda keçirildiyi vurğulanır.    

Daha sonra qeyd edilir ki, toplantı çərçivəsində hər üç ölkəni maraqlandıran regional əməkdaşlığın inkişafı, daha öncəki toplantılarda qəbul edilən qərarların gözdən keçirilməsi nəzərdə tutulur.  

Toplantıda Ə.Davudoğlunun Azərbaycan və Gürcüstan xarici işlər nazirlərilə təkbətək görüşünün keçirilməsi də gözlənilir. İkitərəfli və regional məsələlərin əhatəli şəkildə dəyərləndirildiyi xarici işlər nazirlərinin “üçlü toplantısı”nın qarşılıqlı faydalılıq əsasında hər sahədə ortaq əməkdaşlığın inkişafına, regional sabitlik və təhlükəsizliyin yaxşılaşdırılmasına tövhə veriləcəyi deyilir.-05D-