Xarici İşlər Nazirliyi: Ermənistan Azərbaycanın daxili işlərinə qarışmağa son qoymalıdır

Bakı/16.06.23/Turan: Azərbaycan Xarici İşlər Nazirliyində "Laçın" sərhəd- keçid məntəqəsinin  yaradılmasının Qarabağ erməniləri üçün "gərgin humanitar vəziyyət yaratması" barədə Ermənistanın baş naziri Nikol Paşinyanın fikirlərini cəfəngiyyat adlandırılıb.

İyunun 16-da Paşinyan Ermənistan hökumətinin iclasında bildirib ki, "Azərbaycanın Laçın dəhlizində qanunsuz sərhəd-keçid məntəqəsini quraşdırması, Dağlıq Qarabağa elektrik və təbii qaz təchizatının bloklanması humanitar vəziyyəti son dərəcə gərginləşdirib".

“Bir daha xatırlatmaq istərdik ki, Azərbaycanın öz suveren ərazisində sərhəd nəzarət-buraxılış məntəqəsi təsis etməsi məsələsinə Ermənistan tərəfinin hər hansı bir müdaxiləsi Azərbaycanın suverenliyi və ərazi bütövlüyünə qarşı iddiadır və bu kimi hərəkətlər beynəlxalq hüququn bütün norma və prinsiplərinə ziddir”, - Azərbaycan Xarici İşlər Nazirliyinin şərhində deyilir.

Sənəddə "Qarabağ bölgəsinin erməni sakinləri tərəfindən sərhəd-keçid məntəqəsinin şəffaf, təhlükəsiz və nizamlı şəkildə keçməsi üçün hər cür şərait" yaradıldığı və məntəqənin yarandığı gündən yüzlərlə sakin bu yoldan sərbəst istifadə etdiyi göstərilir.

Sənəddə qeyd olunur ki, Qarabağ bölgəsinin erməni sakinlərinin məntəqədən hər iki istiqamətdə şəffaf, təhlükəsiz və nizamlı keçidi üçün müvafiq şərait yaradılıb və məntəqə təsis edilən gündən yüzlərlə sakin bu yoldan sərbəst şəkildə istifadə edir.

“15 iyun tarixində Ermənistan tərəfindən bu məntəqəyə və sərhədçilərimizə qarşı törədilmiş təxribatın da məqsədi, Azərbaycan tərəfdən sərhəd buraxılış məntəqəsinin uğurlu fəaliyyətinə kölgə salmaq, məntəqədən təhlükəsiz və sərbəst şəkildə istifadəyə maneçilik törətməkdir.

Dövlət Sərhəd Xidmətinin hərbi qulluqçusunun yaralanması ilə nəticələnmiş hücumdan sonra bu təxribatın səbəblərinin araşdırılması, sərhəd buraxılış məntəqəsinin və oradan keçidin təhlükəsizliyinin təmin edilməsi məqsədilə Azərbaycan tərəfindən həyata keçirilən müvafiq tədbirlərin “blokada” kimi qiymətləndirilməsi qəbuledilməzdir”, - məlumatda qeyd olunur.

“Ermənistandan əsassız bəyanatlar vermək əvəzinə, təxribatlardan əl çəkməyi, sülh sazişi üzrə danışıqlara və bölgədə kommunikasiyaların açılması məsələsinə məsuliyyətlə və konstruktiv şəkildə yanaşmağı, öz qüvvələrinin Azərbaycan ərazilərindən tam çıxarılması daxil olmaqla, üçtərəfli bəyanatdan irəli gələn öhdəliklərə riayət etməyi, Azərbaycanın ərazi bütövlüyü və suverenliyinə qarşı addımlardan çəkinməyi tələb edirik”, - Azərbaycan Xarici İşlər Nazirliyinin şərhində deyilir.06В