Xarkovda vəziyyət "çox ağırdır": ABŞ hərbi yardımdan sonra "real dəyişikliklər" gözləyir

Rusiyanın Ukraynanın ikinci böyük şəhəri  Xarkova hücumu fonunda Vaşinqtondakı rəsmi şəxslər deyirlər ki,  ABŞ-ın son hərbi yardımından sonra savaş meydanında "real dəyişikliklər" gözləyirlər. Bu barədə dövlət katibi Blinken Kiyevə səfəri zamanı bildirib, Turan-ın Vaşinqton müxbiri məlumat verib.

"Göründüyü kimi, vəziyyət inanılmaz dərəcədə ağırdır... Biz bilirik ki, bu, çətin vaxtdır, lakin əminik ki, hərbi yardım savaş meydanında real əhəmiyyətə malik olacaq",- cümə axşamı brifinqdə Dövlət Departamentinin rəsmi nümayəndəsinin müavini Vedant Patel Turan-ın sualının cavabında bildirib.

"Dünən dövlət katibi 2 milyard dollarlıq əlavə yardım barədə elan etdi. Bu, təkcə Ukraynanın müdafiə müəssisələri proqramını yaratmaq üçün deyil, həm də Kiyevin Rusiyadan müdafiə qabiliyyətini daha da artırmaq üçündür", - Patel deyib.

Cümə günü səhər Ukrayna rəsmi şəxsləri bildiriblər ki, Rusiya qoşunları Xarkov vilayətinin 10 kilometr dərinliyinə irəliləyib. Prezident Vladimir Zelenski isə jurnalistlərə bildirib ki, Ukrayna qüvvələri vəziyyəti "sabitləşdirib".

"Bu gün qüvvələrimiz rusların irəlilədiyi mövqelərdə vəziyyəti sabitləşdirib. Onların ən dərin irəliləmə nöqtəsi 10 kilometrdir",- Zelenski deyib.