Xədicə İsmayıl sərbəst buraxılıb (YENİLƏNİB)

Jurnalist Xədicə İsmayıl 4 saatdan artıq Bakı hava limanında saxlanıldıqdan sonra sərbəst buraxılıb. Sonda gömrükcülər  jurnalistin flaş kartlarını onlara verməsi tələbindən vaz keciblər. "Chixdim. Dediler flash kart usb kart deyil deye hech onlara lazim da deyil. Men de bundan sonra fotoaparata salib gosyerdim ki kart bodhdur. Cox hirslendiler", - deyə jurnalist bildirib.

*   *   *

2014 Oktyab 03 (Cümə) 21:52:27

Jurnalist Xədicə İsmayıl Strasburqdan gələrkən Bakı hava limanında saxlanıb. O artıq bir saata yaxındır ki, gömrük əməkdaşları tərəfindən bir otağa gətirilib və orada saxlanılır.

X.İsmayıl Amerikanın Səsinə bildirib ki, əvvəlcə pasportunu yoxlayıblar. “Gömrük əməkdaşları çemodanıma çox diqqətlə baxış keçirdilər. Sonra üstümü, ciblərimi yoxladılar. Bank kartlarımı alıb yoxladılar. Hiss etdim ki, cibimdə az pul olması onları məyus etdi. Cəmi 201 dollar, 50 avro, 7 manat pulum var”.

Bundan sonra gömrük əməkdaşı jurnalistin flaş kartlarını yoxlamaq üçün almaq istəyib. “Bu zaman mən flaş kartlarımı vermədim. Mən jurnalistəm və kartlarda mənim yazılarım var. Gömrük əməkdaşları təkid edir və mən flaş kartları vermirəm. İndi deyirlər, aktlaşdırıb polisə təhvil verəcəyik. Gömrük məmuru deyir ki, şübhələnirəm, flaş kartlarda dövlətçiliyə zidd məlumatlar var. Ona görə buraxa bilmərik”, xanım İsmayıl Amerikanın Səsinə deyib.

Xatırladaq ki, Xədicə İsmayıl bu günlərdə siyasi məhbuslara azadlıq tələbi ilə keçirilən aksiyada və Strasburqda Azərbaycanda artan təzyiqlərlə bağlı dinləmələrdə iştirak etdikdən sonra onun Bakı hava limanında saxlanacağı ilə bağlı şayiələr yayılıb.—0--