Xüsusi karantin rejimi avqustun 1-dək uzadılır

Bakı/26.05.21/Turan: Azərbaycanda xüsusi karantin rejiminin müddəti 2021-ci il avqustun 1-nə qədər uzadılıb. Bu barədə baş nazir Əli Əsədovun imzaladığı qərarda deyilir.

Ölkənin şəhər və rayonlarından yerüstü və hava nəqliyyatı ilə sərnişin daşımaları bərpa edilir. Qərara əsasən, mayın 31-i saat 06.00-dan etibarən bu sahədə olan qadağalar aradan qaldırılır.

Bundan əlavə, iri ticarət mərkəzlərinin nəzdindəki uşaq və digər əyləncə mərkəzlərinin, kinoteatrların fəaliyyətinə icazə verilməyəcək.

Dini ibadət yerlərinin (eyni vaxtda ibadət üçün nəzərdə tutulan yerlərin 50 faizindən (ümumi olaraq 50 nəfərdən) çox olmamaqla fəaliyyəti bərpa edilir.

2021-ci ildə futbol üzrə Avropa çempionatının Bakı şəhərində keçiriləcək 4 oyununda məhdud sayda azarkeşin iştirakına icazə verilib.

İyunun 28-dək həftə sonları ictimai nəqliyyatın hərəkəti dayandırılacaq. -16D-