�Yandeks"in Azərbaycana qarşı təxribatı aradan qaldırılıb

Bakı/03.12.18/Turan: Rusiyanın axtarış sistemi "Yandex.ru"nun "Alisa" adlanan "səsli köməkçisində" Azərbaycan haqqında yalan və təhqir xarakterli material Azərbaycan diasporasının və Diaspora ilə iş üzrə Dövlət Komitəsinin müdaxiləsindən sonra proqramdan çıxarılıb.

Moskvanın Azərbaycanlı icmasının sədri Şamil Tağıyevin çağırışı ilə diaspora nümayəndələri sosial şəbəkə vasitəsilə "Yandex" rəhbərliyinə ərizə veriblər.

Bu etirazlar nəticəsində "Alisa" sistemində yerləşdirilən Azərbaycan haqqında yalnış məlumat çıxarılıb, deyə Dövlət Komitəsinin məlumatında bildirilir.

Xatırladaq ki, smartfonlar üçün hazırlanmış səs proqramında Azərbaycan "ləzgilərin, gürcülərin və ermənilərin torpaqlarında yaradılmış saxta dövlət" kimi təqdim edilib, "Azərbaycanlılar" adı isə guya "1936-cı ildə yaranıb".

Qeyd edək ki, "Yandeks"in bölmələrindən biri olan "Yandeks-Taksi"yə etnik erməni Tiqran Xudaverdyan rəhbərlik edir.

2017-ci ildə "Yandeks-Taksi" Uber-lə birləşdikdən sonra Bakı Nəqliyyat Agentliyinin nümayəndəsi xəbərdarlıq edib ki, bu şirkətə Ermənistan vətəndaşı və ya hər hansı erməni milliyyətli şəxs rəhbərlik edərsə onların müəssisəsi sürücülərə bu şirkətlərlə işləməyə imkan verən "fərqlənmə nişanı" verilməsini dayandıracaq və bütün sürücüləri yeni firma ilə əməkdaşlıq etməməyə çağıracaq.

Bu səbəbdən "Yandeks taksi" Azərbaycana gələ bilmədi. - 06D-