YAP rəsmi məlumatlar açıqlanmadan öncə xalqın Referendum Aktını dəstəklədiyini bildirib

Bakı/26.09.16/Turan: Sentyabrın 26-da Azərbaycan Konstitusiyasına dəyişikliklərlə bağlı keçirilən referendumda seçicilərin iştirakı 69,7 faiz təşkil edib. Belə ki, 5 mln.  267 min  111 seçicidən 3 mln.  671  min  7 nəfəri səsvermədə iştirak edib. Bu barədə MSK katibliyi İnformasiya Mərkəzinin rəhbəri Fərid Orucov səsvermənin yekunlarına dair mətbuat konfransında bildirib.

Səsvermənin ilkin nəticələri elan olunmazdan öncə hakim Yeni Azərbaycan Partiyasının icraçı katibi Əli Əhmədov xalqın Konstitusiyaya düzəlişləri dəstəklədiyini bildirib.

Onun fikrincə, eyni zamanda referendum ölkə vətəndaşlarının prezident İlham Əliyevə etimadını nümayiş etdirib.

“Xalq bir daha cənab prezidentə etimad göstərdi. Bu, ümumxalq etimadının sınağı idi. Və bu sınaq yetərincə uğurlu oldu”, - Ə.Əhmədov vurğulayıb.

Referenduma çıxarılan məsələlər Azərbaycan prezidentinin yürütdüyü “uğurlu siyasət”in daha da möhkəmləndirilməsi məqsədi daşıyır. Ə.Əhmədovun sözlərinə görə, islahatlar əsasən iqtisadi sahədə aparılacaq və bu, qarşıya qoyulan bütün sosial məsələlərin həllinə imkan verəcək.

Xarici qurumların - “Opinion Way”  (Fransa) və “Artur J. Finkelstein & Associates”  (ABŞ) (qeyri-rəsmi məlumatlara görə, bu qurumlar hakimiyyət tərəfindən cəlb edilib) və yerli hökumətyönlü QHT-lərin keçirdiyi 4 “exit-poll”un nəticələrinə görə, seçicilərin iştirakı 65-67 faiz təşkil edib. Seçicilərin 85-90 faizi Referendum Aktının bəndlərinə səs verib. –06D--